ডিজিটেল ডেস্কঃ বহু হিন্দু দম্পতীয়ে মন্দিৰত বিবাহপাশত আবদ্ধ হয়। কিন্তু কোনো হিন্দু দেৱতাৰ উপাসনাস্থলীত মুছলমান দম্পতীৰ বিয়া হোৱাটো সততে দেখা নাযায়। তেনে এক সমন্বয়ৰ ছবি এইবাৰ হিমাচল প্ৰদেশত দেখা গৈছে।
দেওবাৰে ইছলামিক ৰীতি-নীতি অনুসৰি শিমলাৰ ৰামপুৰৰ এটা হিন্দু মন্দিৰত বিবাহপাশত আবদ্ধ হয় এহাল দম্পতি। ঠাকুৰ সত্যনাৰায়ণ মন্দিৰত দুয়োটা ধৰ্মৰ লোকে দম্পতীহালৰ বিয়াত অংশগ্ৰহণ কৰে। সেই মন্দিৰৰ ৰক্ষণাবেক্ষণৰ দায়িত্ব বিশ্ব হিন্দু পৰিষদৰ। বিয়াখনত মৌলাৱী, উকীলসকলো উপস্থিত আছিল।
মুছলমান দম্পতীহালৰ পৰিয়ালে জনোৱা মতে, মন্দিৰত সম্প্ৰীতিৰ বাৰ্তা দিবলৈ এই বিবাহৰ আয়োজন কৰা হৈছে। কইনাৰ পিতৃ মহেন্দ্ৰ সিং মালিকে কয়, "ছোৱালীজনীৰ বিয়া হৈছিল ৰামপুৰৰ সত্যনাৰায়ণ মন্দিৰ চৌহদত। চহৰৰ সকলো শ্ৰেণীৰ লোক আগবাঢ়ি আহিছে বিয়াৰ আয়োজন কৰিবলৈ। বিশ্ব হিন্দু পৰিষদ, মন্দিৰ ন্যাসেও অগ্ৰণী ভূমিকা পালন কৰিছে।''
এই বিবাহৰ জৰিয়তে ৰামপুৰৰ বাসিন্দাসকলে সমাজত সমন্বয়ৰ বাৰ্তা প্ৰেৰণ কৰিছে বুলিও তেওঁ কয়। মহেন্দ্ৰই কয় যে তেওঁৰ কন্যা আৰু জোঁৱাই চিভিল ইঞ্জিনিয়াৰ।
মন্দিৰ ট্ৰাষ্টৰ সাধাৰণ সম্পাদক বিনয় শৰ্মাই সংবাদ সংস্থা এএনআইক জনাইছে যে- ''মন্দিৰটো বিশ্ব হিন্দু পৰিষদৰ দ্বাৰা পৰিচালিত। ইয়াত RSS ৰ জিলা কাৰ্যালয়ো আছে। বিশ্ব হিন্দু পৰিষদ আৰু আৰ এছ এছক ‘মুছলমান বিৰোধী’ বুলি কোৱা হয়। কিন্তু এহাল মুছলমান দম্পতীয়ে হিন্দু মন্দিৰত বিয়া পাতিছে। এইটো এটা উদাহৰণ।''
Continue Reading
