মণিপুৰত মানুহৰ মৃত্যু হৈছে আৰু সংসদত মোদীয়ে ধেমালি কৰি আছে! মোদীক কটাক্ষ ৰাহুল গান্ধীৰ

বৃহস্পতিবাৰে লোকসভাত অনাস্থা প্ৰস্তাৱৰ শেষত মোদীৰ দুঘণ্টা ২০ মিনিটৰ ভাষণত মুখ্যতঃ তেওঁৰ চৰকাৰৰ সফলতাৰ দাবী কৰিছিল আৰু জৱাহৰলাল নেহৰুৰ পৰা মনমোহন সিঙলৈকে কংগ্ৰেছৰ প্ৰধানমন্ত্ৰীসকলৰ "বিফলতা"ৰ  বিষয়ত  মন্তব্য কৰিছিল। পূৰ্বৰ কংগ্ৰেছ নেতৃত্বাধীন চৰকাৰৰ বিভিন্ন  "ভুল" দেখুৱাই দি মোদীয়ে হাঁহিছিল।ইয়াৰ পিছতে আজি ৰাহুলে কয়  "মণিপুৰত মানুহৰ মৃত্যু হৈছে, মহিলাসকলক অত্যাচাৰ কৰা হৈছে, আৰু তেওঁ (মোদীয়ে) হাঁহিছে আৰু কৌতুক কৰিছে। মোদীৰ আলোচনাৰ বিষয় আছিল কংগ্ৰেছহে,   মণিপুৰৰ বৰ্তমানৰ সংকট আৰু ইয়াৰ সমাধানৰ উপায় নহয়। ''

বুধবাৰে অনাস্থা প্ৰস্তাৱৰ সময়ত গান্ধীয়ে কৈছিল, "বিজেপিয়ে মণিপুৰত ভাৰত মাতাক হত্যা কৰিছে।" শাসকীয় শিবিৰৰ সাংসদসকলে ৰাহুলৰ মন্তব্যত  তীব্ৰ আপত্তি কৰিছিল। ৰাহুলে তেওঁৰ মন্তব্য "স্পষ্ট" কৰি কৈছিল, "হয়,  বিজেপিৰ বিভাজনমূলক ৰাজনীতিৰ বাবে মণিপুৰ এতিয়া ঐক্যবদ্ধ ৰাজ্য নহয়। মণিপুৰ এতিয়া  দুটা ভাগত বিভক্ত।’’ৰাহুলে দাবী কৰে  যে তেওঁৰ ১৯ বছৰৰ ৰাজনৈতিক অভিজ্ঞতাত, তেওঁ কেতিয়াও মণিপুৰৰ দৰে ভয়ংকৰ পৰিস্থিতিৰ সন্মুখীন হোৱা নাই। ৰাহুলে জুন মাহত মণিপুৰ ভ্ৰমণৰ অভিজ্ঞতাৰ বিষয়েও কয়। তেওঁ কয়, "যেতিয়া মই মেইটেই লোকৰ অঞ্চললৈ গৈছিলো, স্পষ্টকৈ কোৱা হৈছিল যে মোক স্বাগতম জনোৱা হৈছে কিন্তু যদি নিৰাপত্তাকৰ্মীৰ দলটোত কুকি থাকে, তেন্তে তেওঁক গুলীয়াই হত্যা কৰা হ'ব।" ঠিক বিপৰীত কথা কুকিসকলেও কৈছিল। ৰাহুলে লগতে কয় যে  বিজেপিয়ে মণিপুৰত ভাৰতীয়ত্বৰ ধাৰণাটোক হত্যা কৰিছে। ''

মোদীক সমালোচনা কৰি কংগ্ৰেছৰ প্ৰাক্তন সভাপতিগৰাকীয়ে কয়, "মণিপুৰৰ এই সংকটৰ সময়ত প্ৰধানমন্ত্ৰীয়ে দেশৰ কণ্ঠস্বৰ হ'ব লাগিছিল। কিন্তু সেই পথত যোৱাৰ পৰিৱৰ্তে তেওঁ সাধাৰণ ৰাজনীতিবিদৰ দৰে ক্ষুদ্ৰ ৰাজনীতি কৰি আছে। তেওঁ নিৰ্লজ্জভাৱে অধিৱেশনত বহিছিল, হাঁহিছিল, মন্তব্য কৰিছিল।  ''