ডিজিটেল ডেস্কঃ বিদ্ৰোহীৰ আক্ৰমণ নহয়, এইবাৰ অসম ৰাইফলছৰ জোৱানেই গুলীয়ালে নিজৰেই সতীৰ্থক। অসম ৰাইফলছৰ এজন জোৱানে তেওঁৰ সহকৰ্মীসকলৰ ওপৰত গুলীচালনা কৰাৰ ফলত ছজন সৈনিক আহত হৈছে । অভিযুক্ত জোৱানজনে পিছত নিজৰ মূৰত গুলীয়াই আত্মহত্যাৰ চেষ্টা চলায় ।
আহত জোৱানসকলক চিকিৎসাৰ বাবে সেনা চিকিৎসালয়ত ভৰ্তি কৰোৱা হৈছে। সেনাৰ কৰ্তৃপক্ষই ঘটনাটোৰ তদন্তৰ নিৰ্দেশ দিছে।আৰক্ষীয়ে জনোৱা অনুসৰি মঙলবাৰে নিশা দক্ষিণ মণিপুৰৰ চাজিক টাম্পাক অঞ্চলত এই ঘটনা সংঘটিত হয়। অসম ৰাইফলছৰ এজন জোৱানে তেওঁৰ ছজন সহকৰ্মীৰ ওপৰত গুলীচালনা কৰে। আৰক্ষীয়ে প্ৰকাশ কৰা মতে ঘটনাটোৰে ৰাজ্যখনৰ গোষ্ঠীগত সংঘৰ্ষৰ সৈতে কোনো সম্পৰ্ক নাই। অভিযুক্ত আৰু আহত ছজন জোৱান মণিপুৰৰ বাসিন্দা নহয় বুলিও আৰক্ষীয়ে প্ৰকাশ কৰে।
উল্লেখ্য যোৱা বছৰ, ৪৮ ৰাষ্ট্ৰীয় ৰাইফলছৰ এজন জোৱানেও জম্মু -কাশ্মীৰ সীমান্তত তেওঁৰ সহকৰ্মীসকলৰ ওপৰত গুলীচালনা কৰিছিল। ঘটনাটোত কেইবাজনো জোৱান আহত হৈছিল। মণিপুৰতো একে ধৰণৰ ঘটনা সংঘটিত হ’ল। আক্ৰমণকাৰী জোৱান আৰু আহতসকলৰ নাম এতিয়াও জানিব পৰা হোৱা নাই।
Continue Reading
