ডিজিটেল ডেস্কঃ অশান্ত হৈয়ে আছে মণিপুৰ। দ্বিতীয় পৰ্যায়ৰ ভোটগ্ৰহণৰ অন্ত পৰাৰ পাছতে চুবুৰীয়া ৰাজ্য মণিপুৰত সংঘটিত হৈছে হিংসাত্মক কাৰ্যকলাপ। শনিবাৰে মণিপুৰত কুকি উগ্ৰপন্থীয়ে দুঘণ্টা ধৰি নিৰ্বিচাৰ গুলীবৰ্ষণ কৰে।
মণিপুৰৰ নৰসেনা অঞ্চলত সন্দেহযুক্ত কুকি উগ্ৰপন্থীৰ আক্ৰমণত কেন্দ্ৰীয় সংৰক্ষিত আৰক্ষী বাহিনীৰ দুজন জোৱান নিহত হয়। লগতে চাৰিজন জোৱান আহত হয়৷ উল্লেখ কৰা প্ৰয়োজন যে জোৱান কেইজন উক্ত অঞ্চলটোৰ সুৰক্ষাৰ স্বাৰ্থত নিয়োজিত চি আৰ পি এফৰ ১২৮ নং বেটেলিয়নৰ সদস্য আছিল। ৰাজ্যখনৰ বিষ্ণুপুৰ জিলাৰ নৰসেনা অঞ্চলত নিয়োজিত আছিল চিআৰপিএফৰ ১২৮ বেটেলিয়নৰ এই জোৱানসকল। আৰক্ষীয়ে উল্লেখ কৰে যে মাজনিশাৰ পৰা আৰম্ভ হোৱা এই আক্ৰমণ পুৱা ২:১৫ বজালৈকে অব্যাহত থাকে।
সশস্ত্ৰ সংগঠনে নিক্ষেপ কৰা বোমাটো নাৰায়ণসেনাস্থিত বি/১২৮ বিএন চিআৰপিএফৰ আউটপোষ্টৰ ভিতৰত পৰি বিস্ফোৰণ ঘটে। এই আক্ৰমণতে দুজন জোৱান নিহত আৰু চাৰিজন জোৱান আহত হয়৷ পৰিদৰ্শক/জিডি জাদৱ দাস, এছআই/জিডি এন সৰকাৰ, এইচচি/জিডি অৰূপ ছেইনী, আৰু চিটি/জিডি আফতাব হুছেইন আঘাতপ্ৰাপ্ত হোৱাৰ বিপৰীতে এছআই/জিডি এন ছাকাৰ আৰু এইচচি/জিডি অৰূপ ছেইনীৰ মৃত্যু হয়।
উক্ত ঘটনাৰ বাবে প্ৰশাসনে তদন্তৰ বাবে এক নিৰ্দেশনা জাৰি কৰিছে। এই সন্দৰ্ভত মণিপুৰৰ মুখ্য নিৰ্বাচনী বিষয়া প্ৰদীপ কুমাৰ ঝাই বিহিত ব্যৱস্থা ল'বলৈ প্ৰশাসনক অনুৰোধ জনাইছে।
Continue Reading
