মন্ত্ৰীয়ে বিধানসভাত দেখুৱালে বৃদ্ধাংগুষ্ঠ ; কি পৰ্যায়লৈ অৱনমিত হৈছে জনপ্ৰতিনিধিৰ আচৰণ?

দৰাচলতে আজি অসম বিধানসভা উত্তাল হৈ পৰিছিল ধৰ্মপুৰ সমষ্টিৰ বিধায়ক তথা বনমন্ত্ৰী চন্দ্ৰমোহন পাটোৱাৰীৰ এক বিশেষ কাৰ্যত৷যেতিয়া সদনৰ মজিয়াত সংখ্যালঘু উন্নয়নৰ বাবে ব্যয় হোৱা ধনৰ  কথা আলোচনা কৰা হৈছিল,সেই সময়ত বিৰোধীৰ দ্বাৰা কৰা প্ৰশ্নত দিশহাৰা হৈ পৰে মন্ত্ৰী চন্দ্ৰমোহন পাটোৱাৰী৷আৰু শিৱসাগৰ সমষ্টিৰ বিধায়ক  অখিল গগৈৰ এই সন্দৰ্ভত কৰা এটা প্ৰশ্নত বুঢ়া আঙুলি দেখুৱাই ৰাজ্যৰ জ্যেষ্ঠ জনপ্ৰতিনিধি চন্দ্ৰমোহন পাটোৱাৰী-এ৷যাৰ পাছত পাটোৱাৰীৰ এই কাৰ্যত ক্ষুব্ধ হৈ একাংশ বিৰোধী বিধায়কে সদন ত্যাগ কৰে৷তদুপৰি আজি সদনৰ মজিয়াত অসহায় ৰূপত দেখা গ’ল পাটোৱাৰীক৷দিশপুৰ সমষ্টিৰ বিধায়ক অতুল বৰাই  আজি সদনৰ মাজতে গছ ধ্বংস কৰাৰ প্ৰসংগ উত্থাপন কৰি  আমচাং অভয়াৰণ্যৰ পয়ালগা অৱস্থাৰ কথা অৱতাৰণা কৰে৷আৰু সেই প্ৰশ্নটো পাটোৱাৰীয়ে বেৰে চালে কোবোৱা উত্তৰ দিয়ে৷যাক লৈ বিধানসভাত অতুল বৰাই অসন্তুষ্টিও ব্যক্ত কৰে৷

আজি বিধানসভাৰ মজিয়াত মন্ত্ৰীজনৰ ব্যৱহাৰ দেখি হতচকিত হৈ পৰিছে অসমবাসী৷কাৰণ এজন মন্ত্ৰীৰ পৰা সদনত এনে ব্যৱহাৰ মুঠেই গ্ৰহণযোগ্য নহয়৷ভৱিষ্যতৰ বাবে সংসদীয় গণতন্ত্ৰত যাতে চন্দ্ৰমোহন পাটোৱাৰীৰ এই ব্যৱহাৰৰ দৰে অনুৰূপ ঘটনাৰ পুনৰাবৃত্তি নঘটে সকলোৱে তাৰে অন্তঃকৰণেৰে কামনা কৰিছে ৷