ডিজিটেল ডেস্ক: কিমান যে মৰ্মান্তিক! হয়, এয়া আছিল কেদাৰনাথৰ হেলিকপ্টাৰ দুৰ্ঘটনাৰ পূৰ্বে এগৰাকী পাইলটৰ পত্নীৰ সৈতে হোৱা শেষ কথোপকথন। ১৮ অক্টোবৰত উত্তৰাখণ্ডৰ কেদাৰনাথত সংঘটিত এক মৰ্মান্তিক দুৰ্ঘটনাত পাইলটসহ মুঠ ৭ জন লোকৰ মৃত্যু হয়। আৰু বৰ্তমান চৰ্চালৈ আহিছে এই দুৰ্ঘটনাত প্ৰাণ হেৰুওৱা পাইলটগৰাকীৰ পৰিয়ালৰ সৈতে শেষবাৰৰ বাবে হোৱা কথা-বতৰাৰ তথ্য। মৃত্যুৰ এদিন পূৰ্বে যেতিয়া হেলিকপ্টাৰ পাইলট অনিল সিঙে পত্নীৰ সৈতে কথা পাতিছিল, তেতিয়া তেওঁ কন্যাৰ স্বাস্থ্যক লৈ উদ্বেগ প্ৰকাশ কৰিছিল। পাইলটগৰাকীৰ পত্নীয়ে আগবঢ়োৱা এই বিশেষ মন্তব্যত বৰ্তমান সকলো মৰ্মাহত হৈ পৰিছে।
হয়, দৰ্শনৰ বাবে উত্তৰাখণ্ডৰ কেদাৰনাথত উপস্থিত হয় হাজাৰ হাজাৰ ভক্ত। ইয়াৰে বহু লোক হেলিকপ্টাৰেৰে কেদাৰনাথলৈ যায়। ইয়াত ব্যক্তিগত কোম্পানীৰ হেলিকপ্টাৰে এই সেৱা আগবঢ়ায়। ১৮ অক্টোবৰ মঙলবাৰে কেদাৰনাথৰ গৰুদাচট্টিত ৬ জন লোকৰ সৈতে এখন ব্যক্তিগত কোম্পানীৰ হেলিকপ্টাৰে উৰা মাৰিছিল যদিও উৰণৰ কিছু সময়ৰ পিছতে হেলিকপ্টাৰখন দুৰ্ঘটনাগ্ৰস্ত হৈ বাগৰি পৰে। দুৰ্ঘটনাটো ইমানেই ভয়ংকৰ আছিল যে বিমানখনত থকা আটাইকেইজন লোকৰ থিতাতে মৃত্যু হয়।
এই হেলিকপ্টাৰৰ পাইলট হিচাপে থকা অনিল সিং মুম্বাইৰ আন্ধেৰী উপনগৰৰ এখন আৱাসিক সমাজত বাস কৰিছিল। ইহসংসাৰত এৰি থৈ যায় পত্নী শ্বিৰিন আনন্দিতাৰ লগতে কন্যা ফিৰোজা সিঙক। পেছাত চলচ্চিত্ৰ লেখিকা আনন্দিতাই কয় যে, 'শেষবাৰৰ বাবে কালি (সোমবাৰ) তেওঁৰ ফোন আহিছিল। মোৰ ছোৱালীজনী সুস্থ নহয়। সেয়ে তেওঁ মোক মোক কণমানিজনীৰ যত্ন ল'বলৈ কৈছিল।'
মূলতঃ পূব দিল্লীৰ শ্বাহদৰা অঞ্চলৰ বাসিন্দা সিং যোৱা ১৫ বছৰ ধৰি মুম্বাইত বাস কৰিছিল। ইফালে পত্নী আনন্দিতাই কয় যে তেওঁৰ কাৰো বিৰুদ্ধে কোনো অভিযোগ নাই কাৰণ সেয়া আছিল এক দুৰ্ঘটনা মাত্ৰ।
Continue Reading
