ডিজিটেল ডেস্ক: বিদ্ৰোহী কৃষকৰ বজ্ৰগৰ্জনত কঁপি উঠিল দিল্লীৰ ৰামলীলা ময়দান। মোদী চৰকাৰৰ কৃষকবিৰোধী নীতিৰ বিৰুদ্ধে ৰামলীলা ময়দানত সাব্যস্ত হ’ল তীব্ৰ প্ৰতিবাদ। সংযুক্ত কিষাণ মৰ্চাৰ নেতৃত্বত দিল্লীত কৃষকে অনুষ্ঠিত কৰিলে মহাপঞ্চায়ত।
সহস্ৰাধিক কৃষকৰ প্ৰতিবাদত কঁপিল ৰাজধানী দিল্লী। পঞ্জাব আৰু হাৰিয়ানাৰ প্ৰায় ৫০ হাজাৰৰো অধিক কৃষকে অংশ লয় মহাপঞ্চায়তত। দেশৰ প্ৰায় ৩৭ টাকৈ কৃষক সংগঠনৰ প্ৰতিনিধিয়ে অংশ লৈছে আজিৰ এই প্ৰতিবাদত। খাদ্য শস্যৰ ন্যূনতম সমৰ্থন মূল্যৰ ক্ষেত্ৰত আইন বলৱৎ কৰাৰ দাবী প্ৰতিবাদী কৃষকৰ।
স্বামীনাথন আয়োগৰ পৰামৰ্শৱলী শীঘ্ৰেই কাৰ্যকৰী কৰাৰ দাবী উত্থাপন কৰে প্ৰতিবাদী কৃষকে। লগতে কৃষক তথা কৃষিকৰ্মৰে জড়িত ব্যক্তিক পেঞ্চন প্ৰদানৰো দাবী প্ৰতিবাদী কৃষকৰ। দেশত প্ৰতিদিনে কৃষকে আত্মহত্যাৰ পথ বাচি লোৱাৰ পাছতো চৰকাৰে ঋণ মাফ নকৰাক লৈ সৰব হৈ পৰে কৃষকসকল।
আজিৰ মহাপঞ্চায়ততে কৃষকৰ দাবী সম্বলিত সংকল্প পত্ৰ ঘোষণা কৰে কৃষক সংগঠনসমূহে। মোদী চৰকাৰে কৃষকৰ দাবী মানি নল’লে আন্দোলন তীব্ৰতৰ হোৱাৰ হুংকৰা প্ৰদান কৰে প্ৰতিবাদী কৃষকে। মোদী চৰকাৰক পুঁজিপতিৰ সমৰ্থক তথা সাম্প্ৰদায়িক আখ্যা প্ৰতিবাদী কৃষকৰ। বিগত মাহতো দেশৰ কৃষক সংগঠনে গ্ৰহণ কৰিছিল দিল্লী চলো কাৰ্যসূচী। ব্যৰ্থ হৈছিল কেন্দ্ৰীয় চৰকাৰৰে কৃষক সংগঠনৰ কেইবালানি আলোচনা। পঞ্জাব, হাৰিয়ানা, উত্তৰ প্ৰদেশ আদি ৰাজ্যৰ কৃষকৰ ওপৰত জপিয়াই পৰিছিল আৰক্ষী বাহিনী।
আজিও কৃষকৰ মহাপঞ্চায়তৰ পূৰ্বে কটকটীয়া নিৰাপত্তা বেষ্টনী গঢ়ি তোলা হয় দিল্লীত।
ইপিনে, প্ৰতিবাদস্থলীৰ পৰাই কেন্দ্ৰীয় চৰকাৰক হুংকাৰ কৃষক নেতা ৰাকেশ টিকাইটৰ। আজি মহাপঞ্চায়তৰ জৰিয়তে চৰকাৰক এই বাৰ্তা দিব খোৱা হৈছে যে দেশৰ কৃষকসকল একত্ৰিত হৈ আছে। চৰকাৰে আলোচনাৰ মাধ্যমেৰে কৃষকৰ সমস্যাসমূহ সমাধান কৰা উচিত। নহ’লে আগন্তুক সময়ত অধিক তীব্ৰতৰ হ’ব কৃষকৰ আন্দোলন। প্ৰতিবাদস্থলীৰ পৰাই চৰকাৰক এই হুংকাৰ কৃষক নেতাগৰাকীৰ।
Continue Reading
