ডিজিটেল ডেস্কঃ মৃত্যুৰ খবৰ সদায়ে বেদনাদায়ক আৰু যদিহে সেই মৃত্যু অকালমৃত্যু হয় তেন্তে তাৰ দুখ যেন দুগুণে বাঢ়ে। আজিকালি মৃত্যু যেন একেবাৰে সহজ হৈ পৰিছে। চৌপাশৰ পৰা আহি থকা বাতৰিবোৰে যেন কৈ যায় মৃত্যু আজিকালি একেবাৰে সহজ আৰু সুলভ। শেহতীয়াকৈ আহিছে এক মৃত্যুৰ খবৰ। বিয়াঘৰত নাচি নাচিয়ে মৃত্যুক সাবটি ল’লে এজন ব্যক্তিয়ে। বিয়াৰ ৰভাতলীৰ আনন্দময় পৰিৱেশৰ মাজতে হঠাৎ নামি আহিল দুখৰ কলীয়া ডাৱৰ। খুলশালীয়েকৰ বিয়াত মনৰ আনন্দত নাচি থকাৰ সময়তে হঠাৎ ঢলি পৰি মৃত্যুক সাৱটি ল’লে কইনাৰ ভিনিহিয়েকে।
এই মৰ্মান্তিক ঘটনা সংঘটিত হৈছে ৰাজস্থানৰ পালিত। মৃত ব্যক্তিজন ৪২ বৰ্ষীয় আব্দুল চেলিম পাঠান বুলি জানিব পৰা গৈছে। ঘটনা অনুসৰি খুলশালীয়েকৰ বিয়া উপলক্ষে আনন্দত মতলীয়া হৈ পৰিছিল পালিৰ ৰানাবাস ষ্টেছনৰ নিৱাসী আব্দুল চেলিম পাঠান।
চাওক ভিডিঅ’
ৰভাতলীৰ মঞ্চত আন লোকৰ সৈতে তেওঁ ডিজেৰ তালে তালে আনন্দ মনেৰে নাচি থকাৰ সময়তে হঠাৎ হৃদৰোগত আক্ৰান্ত হৈ ঢলি পৰে। লগে লগে ব্যক্তিজনক নিকটৱৰ্তী হাস্পতাললৈ লৈ যোৱা হয় যদিও চিকিৎসকে তেওঁক মৃত বুলি ঘোষণা কৰে।
জানিব পৰা মতে, মৃত আব্দুল চেলিম পাঠান এখন চৰকাৰী বিদ্যালয়ৰ শাৰীৰিক শিক্ষাৰ প্ৰশিক্ষক আছিল। আব্দুল চেলিম পাঠানে পত্নীসহ দুই সন্তানক এৰি থৈ গৈছে। এই মৃত্যুৰ ঘটনাই শোকস্তব্ধ কৰি তুলিছে পৰিয়ালৰ লগতে সমগ্ৰ অঞ্চলটোক।
Continue Reading
