মৃত্যুপুৰীলৈ ৰূপান্তৰিত হোৱা ৱায়নাডবাসীলৈ সকাহ! ভুক্তভোগীৰ কাষত থিয় দিছে দক্ষিণৰ চিনেমা তাৰকাসকল

ডিজিটেল ডেস্কঃ ভূমিস্খলনৰ বাবে কেৰালাৰ ৱায়নাড মৃত্যুপুৰীলৈ ৰূপান্তৰিত হৈছে। মৃত্যুৰ সংখ্যা ৩০০ অতিক্ৰম কৰিছে। এই দুৰ্দশাত দক্ষিণৰ চলচ্চিত্ৰ জগতৰ তাৰকাসকলে ভুক্তভোগীৰ কাষত থিয় দিছিল। জ্যোতিকা, কাৰ্তি, সূৰ্যকে ধৰি বহু অভিনেতাই সকাহ দি সহায়ৰ উদ্যোগ লৈছে।

মালয়ালমৰ তাৰকা যুটি ফাহাদ ফাচিল আৰু নাজাৰিয়া নাজিমে ২৫ লাখ টকা দিছে। এক অধিসূচনাত তেওঁলোকে লিখিছে, "আমি মুখ্যমন্ত্ৰীৰ সকাহ পুঁজিৰ বাবে ২৫ লাখ টকা দিছো। আশাকৰোঁ এই দুৰ্যোগত টকাৰ প্ৰয়োজন হোৱা সকলে কিছু সহায় লাভ কৰিব। এই কঠিন সময়ৰ মাজেৰে পাৰ হৈ যোৱাসকলৰ বাবে আমি প্ৰাৰ্থনা কৰি যাওঁ। আমি এই যুঁজখন একেলগে জয়ী হ’ম।"

তামিল অভিনেতা বিক্ৰমেও নিহতসকলৰ বাবে ২০ লাখ টকা আগবঢ়ায়। বিক্ৰমৰ মেনেজাৰে এই খবৰ ছচিয়েল মিডিয়াত প্ৰকাশ কৰে। মালয়ালম অভিনেতা মামুটী আৰু তেওঁৰ পুত্ৰ দুলকুৰ ছালমানেও মুখ্যমন্ত্ৰীৰ সাহায্যৰ বাবে ৩৫ লাখ টকা আগবঢ়ায়। জ্যোতিকা, কাৰ্তি আৰু সূৰ্য্যই মিলি ৫০ লাখ টকা আগবঢ়ায়।

মন কৰিবলগীয়া যে এতিয়ালৈকে কেৰালাৰ স্বাস্থ্যমন্ত্ৰীয়ে ৩০৮ জন লোকৰ মৃত্যু হোৱা বুলি নিশ্চিত কৰিছে। জানিব পৰা মতে, এতিয়ালৈকে বহু মৃতদেহ উদ্ধাৰ হোৱা নাই। ড্ৰ’নৰ জৰিয়তে মৃতদেহ উদ্ধাৰৰ চেষ্টা অব্যাহত আছে। এই উদ্ধাৰ অভিযানত প্ৰশিক্ষিত কুকুৰকো ব্যৱহাৰ কৰা হৈছে।