ডিজিটেল ডেস্কঃ মূল্যবৃদ্ধিকে ধৰি আন কেইবাটাও সমস্যা সমাধানৰ দাবীত এইবাৰ নতুন দিল্লীত ধৰ্ণাত বহিল প্ৰধানমন্ত্ৰী নৰেন্দ্ৰ মোদীৰ ভাতৃয়ে। প্ৰধানমন্ত্ৰী নৰেন্দ্ৰ মোদীৰ ভাতৃ প্ৰহ্লাদ মোদী অল ইণ্ডিয়া ফেয়াৰ প্ৰাইচ শ্বপ ডিলাৰ ফেডাৰেচন (এআইএফপিএছডিএফ)ৰ উপ-সভাপতি। মঙলবাৰে সংগঠনটোৰ বিভিন্ন দাবীৰ সমৰ্থনত । প্ৰহ্লাদ মোদীয়ে অল ইণ্ডিয়া ফেয়াৰ প্ৰাইচ শ্বপ ডিলাৰফেডাৰেচন (এআইএফপিএছডিএফ)ৰ আন কেইবাজনো সদস্যৰ সৈতে যন্তৰ মন্তৰত বেনাৰ প্ৰদৰ্শন কৰি শ্ল'গান দিয়ে।
প্ৰহ্লাদ মোদীয়ে কয় " এআইএফপিএছডিএফৰ এটা প্ৰতিনিধি দলে প্ৰধানমন্ত্ৰী নৰেন্দ্ৰ মোদীক এখন স্মাৰকপত্ৰ প্ৰদান কৰিব , য'ত আমাৰ অস্তিত্ব ৰক্ষাৰ বাবে আমাৰ দীৰ্ঘদিনীয়া দাবীসমূহৰ তালিকা প্ৰস্তুত কৰা হ'ব। বৰ্তমান সামগ্ৰীৰ দাম বৃদ্ধিৰ পিছতো সুলভ মূল্যৰ সামগ্ৰীৰ দাম প্ৰতি কিলোগ্ৰামত মাত্ৰ ২০ পইচা বৃদ্ধি কৰাটো হাস্যকৰ। আমি কেন্দ্ৰীয় চৰকাৰক আমাক সকাহ দিবলৈ আৰু আমাৰ বিত্তীয় দুখ-কষ্ট নিবাৰণ কৰিবলৈ অনুৰোধ জনাইছো," ।
তেওঁ লগতে কয় যে এআইএফপিএছডিএফে বুধবাৰে এখন ৰাষ্ট্ৰীয় কাৰ্যনিৰ্বাহক সভা অনুষ্ঠিত কৰিব আৰু সেই সভাতে তেওঁলোকৰ পৰৱৰ্তী কাৰ্যপন্থা নিৰ্ধাৰণ কৰা হ'ব। এআইএফপিএছডিএফৰ ৰাষ্ট্ৰীয় সাধাৰণ সম্পাদক বিস্বমভৰ বসুৱে কয় যে তেওঁলোকে বুধবাৰে লোকসভাৰ অধ্যক্ষ ওম বিৰলাকো সাক্ষাৎ কৰাৰ পৰিকল্পনা কৰিছে৷ এআইএফপিএছডিএফে চাউল, ঘেঁহু আৰু চেনীৰ দাম বৃদ্ধিৰ বাবে হোৱা ক্ষতিপূৰণ দাবী কৰি আহিছে, লগতে ন্যায্য মূল্যৰ দোকানৰ জৰিয়তে খোৱা তেল আৰু মাহজাতীয় শস্য যোগান ধৰাৰো দাবী জনাই আহিছে৷ 'পশ্চিম বংগ ৰেচন মডেল' সমগ্ৰ দেশতে কাৰ্যকৰী কৰাৰো দাবীৱ জনায় সংস্থাটোৰ নেতাসকলে।
গ্ৰাম্য অঞ্চলৰ সুলভ মূল্যৰ দোকানৰ ব্যৱসায়ীসকলক চাউল আৰু ঘেঁহুৰ বাবে পোনপটীয়াকৈ ক্ৰয় এজেণ্ট হিচাপে কাম কৰাৰ অনুমতি দিয়া উচিত বুলিও তেওঁলোকে কয়। প্ৰহ্লাদ মোদীয়ে কয় "আমাৰ দাবীসমূহ সংসদত টিএমচিৰ সাংসদ সৌগত ৰয়েও উত্থাপন কৰিছিল,"। দাবী পূৰণ নোহোৱালৈকে তেওঁলোকৰ প্ৰতিবাদ অব্যাহত থাকিব বুলিও মোদীয়ে স্পষ্ট কৰি দিয়ে।
Continue Reading
