ডিজিটেল ডেস্কঃ এয়াৰ ইণ্ডিয়াৰ বিমানত সহযাত্ৰীৰ ওপৰত প্ৰস্ৰাৱ কৰাৰ অভিযোগত অভিযুক্ত শংকৰ মিশ্ৰ ক’ত আছে? সেই লৈ দিল্লী আৰক্ষী ব্যস্ত হৈ পৰিছে। আৰক্ষীয়ে সন্দেহ প্ৰকাশ কৰা মতে, বাংগালুৰুত তেওঁ লুকাই আছে।
দিল্লী আৰক্ষীয়ে ইতিমধ্যে দুটাকৈ দল গঠন কৰিছে। এটা দল মুম্বাইলৈ আৰু আনটো বেংগালুৰুলৈ প্ৰেৰণ কৰিছে। কিন্তু ক’তো শংকৰৰ সন্ধান পোৱা হোৱা নাই। তেন্তে ক’ত গ’ল শংকৰ? এইটোৱেই এতিয়া আটাইতকৈ ডাঙৰ প্ৰশ্ন হৈ পৰিছে আৰক্ষীৰ বাবে।
ঘটনাটোৰ সংক্ৰান্তত শংকৰৰ ভগ্নীক বেংগালুৰুত সোধা-পোছা কৰিছে। তদুপৰি তেওঁৰ দেউতাককো মুম্বাইত আৰক্ষীয়ে সোধা-পোছা কৰি আছে। দিল্লী আৰক্ষীৰ সূত্ৰঅনুসৰি, শংকৰক বিচাৰি উলিওৱাৰ বাবে তদন্তকাৰী দলটো বেংগালুৰুতে থাকিব।
অৱশ্যে, আৰক্ষীৰ এটা সূত্ৰই দাবী কৰিছে যে তেওঁলোকে ইতিমধ্যে শংকৰৰ বৰ্তমানৰ অৱস্থানৰ বিষয়ে কিছু তথ্য লাভ কৰিছে আৰু যথোচিত ব্যৱস্থা ল’বলৈ উলাইছে।
উল্লেখ্য যে ২৬ নৱেম্বৰত শংকৰৰ বিৰুদ্ধে নিউয়ৰ্ক-দিল্লীৰ এখন বিমানৰ বিজনেছ ক্লাছত এগৰাকী বৃদ্ধা মহিলাৰ ওপৰত প্ৰস্ৰাৱ কৰাৰ অভিযোগ উত্থাপিত হৈছিল। তাৰপাছতে ২৮ ডিচেম্বৰত এয়াৰ ইণ্ডিয়াই শংকৰৰ বিৰুদ্ধে দিল্লীৰ পালম আৰক্ষী থানাত এটা গোচৰ ৰুজু কৰিছিল। শংকৰ তেতিয়াৰ পৰা পলাতক হৈ আছে। শংকৰ মূলতঃ উত্তৰ প্ৰদেশৰ বাসিন্দা।
Continue Reading
