ডিজিটেল ডেস্কঃ নৱ প্ৰজন্মক ডিজিটেল পেমেণ্টত গুৰুত্ব দিবলৈ পৰামৰ্শ দিলে প্ৰধানমন্ত্ৰী নৰেন্দ্ৰ মোদীয়ে। দিল্লী বিশ্ববিদ্যালয়ৰ এক অনুষ্ঠানত ভাগ ল’বলৈ যোৱাৰ সময়তে মেট্ৰ’ ৰে’লত মোদীয়ে ছাত্ৰ-ছাত্ৰীসকলক এই আহ্বান জনায়।
শুকুৰবাৰে পুৱাই দিল্লী মেট্ৰ'ত উঠি দিল্লী বিশ্ববিদ্যালয়লৈ যাত্ৰা কৰিছিল প্ৰধানমন্ত্ৰী নৰেন্দ্ৰ মোদীয়ে। মেট্ৰ’ ৰে’লত প্ৰধানমন্ত্ৰীয়ে সাধাৰণ যাত্ৰীৰ লগতে তাত ভ্ৰমণ কৰা শিক্ষাৰ্থীৰ সৈতে মত বিনিময় কৰে।
পিছত বিশ্ববিদ্যালয়ৰ শিক্ষাৰ্থীসকলৰ সৈতে মত বিনিময় কৰোতে মোদীয়ে তেওঁৰ মেট্ৰ’ ৰে’লত যাত্ৰা অভিজ্ঞতাৰ বিষয়েও কয়।আলোচনাত নতুন অ'টিটি শৃংখলা বা ভাইৰেল ৰিলছৰ দৰে বিষয়বোৰেও ঠাই পায়। মোদীয়ে কয় "ইয়াত থকা বহু শিক্ষাৰ্থীৰ দৰে ময়ো আজি মেট্ৰ'ত ভ্ৰমণ কৰিছো। তেওঁলোকৰ বহুত ক'বলগীয়া আছিল। বিজ্ঞানৰ বিভিন্ন শাখাৰ পৰা অ'টিটিৰ নতুন শৃংখলা, তেওঁলোকে একো বাদ দিয়া নাই।"
মোদীয়ে জনোৱা ডিজিটেল পেমেণ্টৰ আহ্বানৰ পিছতে কেন্দ্ৰীয় মন্ত্ৰী অশ্বিনী বৈষ্ণৱে টুইট কৰি কয়, "সকলোৱে ৭ দিনৰ বাবে এয়া চেষ্টা কৰোঁ আহক। " উল্লেখ্য দেশত বিমুদ্ৰাকৰণ আৰম্ভ হোৱাৰ সময়ৰে পৰাই মোদীয়ে ডিজিটেল পেমেণ্টৰ বিষয়ত জোৰ দি আহিছে।
Continue Reading
