ডিজিটেল ডেস্কঃ নাগালেণ্ড আৰু মেঘালয়ত অহা ২৭ ফেব্ৰুৱাৰীত হ'বলগীয়া বিধানসভা নিৰ্বাচনৰ বাবে বিভিন্ন ৰাজনৈতিক দলে প্ৰচাৰ অভিযান অব্যাহত ৰাখিছে। এই বিধানসভা নিৰ্বাচনৰ বাবে প্ৰায়বোৰ ৰাজনৈতিক দলৰ নেতাই জনসভাত অংশগ্রহণ কৰি প্ৰচাৰ চলোৱাৰ লগতে বিভিন্ন ঠাইত ভোটদাতাৰ ঘৰে ঘৰে গৈও প্ৰচাৰ চলাইছে। সমাগত বিধানসভা নিৰ্বাচনৰ বাবে প্ৰচাৰ অভিযান তুংগত উঠিছে। বিজেপি, এন ডি পি পি, এন পি এফ দলৰ তাৰকা প্ৰচাৰকসকলে জনসভাসমূহত অংশগ্ৰহণ কৰি নিজ নিজ দলৰ প্ৰাৰ্থীসকলৰ বাবে জনসাধাৰণৰ সঁহাৰি বিচৰা পৰিলক্ষিত হৈছে।
নাগালেণ্ড বিধানসভা নিৰ্বাচনৰ পূৰ্বে বহু নেতাৰ সোঁত বৈছে ৰাজ্যখনলৈ। ইয়াৰ মাজতে আজি অৰ্থাৎ ২০ ফেব্ৰুৱাৰীত কেন্দ্ৰীয় গৃহমন্ত্ৰী অমিত শ্বাহ আহিব নাগালেণ্ডলৈ। এক বৃহৎ ৰোড শ্ব'ত অংশগ্ৰহণ কৰিব অমিত শ্বাহে।
দুদিনীয়া ভ্ৰমণসূচীৰে উত্তৰ-পূৱলৈ আহিব অমিত শ্বাহ। তেওঁ নাগালেণ্ডৰ উপৰিও মেঘালয়ৰ শ্বিলঙৰ এক নিৰ্বাচনী সভাও সম্বোধন কৰিব।
নাগালেণ্ডৰ এগৰাকী বিজেপি নেতাই কয় যে," অমিত শ্বাহে গুজৰাটৰ দৰেই নাগালেণ্ডৰ বিজেপি কৰ্মীসকলৰ মনোবল বঢ়াবলৈ আহিব। আমি নিশ্চিত যে নাগালেণ্ডৰ জনসাধাৰণৰ বিজেপি তথা প্ৰধানমন্ত্ৰী নৰেন্দ্ৰ মোদীৰ ওপৰত আস্থা আছে।
'নাগালেণ্ডক বিজেপিৰ প্ৰয়োজন' শীৰ্ষক এখনি চুটি ছবিও নিৰ্বাচনী প্ৰচাৰৰ অংশ হিচাপে এখন চুটি ছবি বুধবাৰে মুকলি কৰে বিজেপিয়ে।
উল্লেখ্য যে ৬০ জনীয়া নাগালেণ্ড বিধানসভাত ২৭ ফেব্ৰুৱাৰীত ভোটগ্ৰহণ অনুষ্ঠিত হ'ব। আনহাতে ভোটগণনা ২ মাৰ্চত গ্ৰহণ কৰা হ'ব।
Continue Reading
