ডিজিটেল ডেস্কঃ ৰহা কাপুৰৰ বয়স মাত্ৰ ডেৰ বছৰ। ছ’চিয়েল মিডিয়াত ভাইৰেল হৈছে ৰণবীৰ কাপুৰ আৰু আলিয়া ভাটৰ কন্যা। পিতৃ হিচাপে ইতিমধ্যে শহুৰেক মহেশ ভাট, শাহুৱেক ছোনী ৰাজদানৰ প্ৰশংসা লাভ কৰিছে ৰণবীৰে। আইতা নীতু কাপুৰ নিশ্চিত যে তেওঁৰ পুত্ৰৰ গুণ এইবাৰ নাতিনীয়েকলৈ আগবঢ়াই নিব।
শেহতীয়াকৈ মাক আৰু ভগ্নীৰ সৈতে কপিল শৰ্মাৰ নতুন অনুষ্ঠানলৈ আহিছিল ৰণবীৰ। তাতে কপিলৰ বিভিন্ন প্ৰশ্নৰ উত্তৰ দিলে ৰণবীৰ-নীতৰাই। কিন্তু ৰহাই পিতৃৰ পৰা কি কি গুণ পাব সেই প্ৰশ্নত নীতুৱে কয় যে ঋষি কাপুৰে সৰুৰে পৰাই নিজৰ দুই সন্তান ৰণবীৰ আৰু ৰিদ্ধিমাক পাৰিবাৰিক মূল্যবোধেৰে ডাঙৰ-দীঘল কৰি আহিছে। কেৱল সেয়াই নহয়, ঋষিয়ে তেওঁক সৰুৰে পৰা ধনৰ মূল্যক সন্মান কৰিবলৈ শিকাইছিল।
নীতুৱে ক’লে, “মোৰ সন্তান দুটা বৰ বাধ্য আছিল। ঘৰত কেতিয়াও জোৰেৰে কথা কোৱা নাছিল’’। নীতুৱে ভাবে যে এজন পিতৃৰ এই গুণবোৰে কন্যা ৰহা পাব। কিন্তু ৰণবীৰে ক’লে, দেউতাই তেওঁক আৰু এটা কথা শিকাইছে, মাক নীতুক নিঃচৰ্তভাৱে ভালপোৱা।
Continue Reading
