ডিজিটেল ডেস্কঃ মল্লযুঁজাৰুৰ প্ৰতিবাদে এইবাৰ নতুন ৰূপ ল’লে। গংগাত পদক বিসৰ্জন দিবলৈ হৰিদ্বাৰলৈ গৈছিল মল্লযুঁজাৰুসকলে। অৱশেষত পদক বিসৰ্জনৰ পৰা বিৰত থাকিল তেওঁলোক।
এই প্ৰতিবাদৰ ভাষা কিংম্বদন্তী বক্সাৰ মহম্মদ আলীৰ পৰা অনুপ্ৰাণিত বুলি বিশ্বাস কৰা হৈছে। ১৯৬০ চনত মহম্মদ আলীয়ে বৰ্ণবৈষম্যৰ বিৰুদ্ধে এনেধৰণে প্ৰতিবাদ কৰিছিল। আমেৰিকা যুক্তৰাষ্ট্ৰৰ অহাইঅ’ নদীত দলিয়াই দিছিল অলিম্পিক পদক।
আমেৰিকা যুক্তৰাষ্ট্ৰত সেই সময়ত প্ৰচলন হৈ থকা বৰ্ণবৈষম্যৰ বাবে শ্বেতাংগ মানুহৰ ৰেষ্টুৰেণ্টত মহম্মদ আলীক খাদ্য দিয়া হোৱা নাছিল। বক্সাৰগৰাকী কৃষ্ণাংগ বাবেই এই নিষেধ কৰা হৈছিল। মহম্মদ আলীয়ে এনে বৰ্ণবাদী ব্যৱস্থাৰ বিৰুদ্ধে মাত মাতিছিল। প্ৰতিবাদস্বৰূপে তেওঁ অলিম্পিক পদকটো নদীত দলিয়াই দিছিল।
এই কাৰ্যৰ পাছত অলিম্পিক কৰ্তৃপক্ষই অৱশ্যে মহম্মদ আলীৰ বিৰুদ্ধে কোনো ব্যৱস্থা গ্ৰহণ নকৰিলে। ৩৬ বছৰৰ পাছত বক্সাৰজনক তেওঁৰ পদকৰ প্ৰতিৰূপটো দিয়া হৈছিল। ১৯৯৬ চনত মহম্মদ আলীয়ে টৰ্চ জ্বলাই আটলান্টা অলিম্পিক মুকলি কৰে। সেই সময়ত অলিম্পিক কমিটীৰ সভাপতি জুয়ান সমৰাঞ্চ আহি মহম্মদ আলীক নদীত উটুৱাই দিয়াৰ পদকৰ এটা প্ৰতিৰূপ উপহাৰ দিছিল।
উল্লেখ্য যে কেচিয়াছ ক্লে’ উৰফে মহম্মদ আলীক বক্সিঙৰ কিংম্বদন্তি হিচাপে গণ্য কৰা হয়। সমগ্ৰ জীৱন ক্ৰীড়া আৰু মানৱতা-সমতাৰ হকে কাম কৰি অহা মহম্মদ আলীক আজিও অনুৰাগীসকলে শ্ৰদ্ধাৰে সোঁৱৰণ কৰি আহিছে।
Continue Reading
