ডিজিটেল ডেস্কঃ নেপালত দুৰ্ঘটনাগ্ৰস্ত হোৱা বিমানখনৰ ব্লেকবক্সটো প্ৰায় ২৪ ঘণ্টাপিছত উদ্ধাৰ কৰা হৈছে । বিমানবন্দৰৰ এজন বিষয়া শ্বেৰ বাথ ঠাকুৰে এই কথা প্ৰকাশ কৰিছে। দেওবাৰে পুৱা প্ৰায় ১১ বজাত কাঠমাণ্ডুৰ পৰা আহি পোখৰাত অৱতৰণ কৰাৰ ১০ ছেকেণ্ড পূৰ্বে বিমান খন হঠাতে চেতি গাণ্ডাকী নদীৰ পাৰত থকা এখন অৰণ্যত দুৰ্ঘটনাগ্ৰস্ত হৈছিল।
ঘটনাটোত বিমান খনত থকা সকলো যাত্ৰী নিহত হৈছে বুলি নেপালৰ সেনাই প্ৰকাশ কৰিছে। নিহতসকলৰ ভিতৰত পাঁচজন ভাৰতীয়ো আছে। প্ৰথমতে দুৰ্ঘটনাটো বেয়া বতৰৰ ফলত হৈছিল বুলি ভবা হৈছিল । অৱশ্যে পিছলৈ নেপাল বিমান পৰিবহন মন্ত্ৰালয়ে কৈছে যে বতৰ বেয়া নাছিল, কালি নেপালৰ আকাশ পৰিষ্কাৰ আছিল। যান্ত্ৰিক ত্ৰুটিৰ বাবেই বিমানখন দুৰ্ঘটনাগ্ৰস্ত হোৱা বুলি ধাৰণা কৰা হৈছে।
এয়াৰ ট্ৰেফিক কণ্ট্ৰোল (এটিচি)ৰ মতে দুসপ্তাহ আগতে উদ্বোধন কৰা পোখৰাৰ বিমান বন্দৰৰ চীনে নিৰ্মাণ কৰা ৰানৱে পূব-পশ্চিম দিশত আছে। প্ৰথমতে পাইলটজনক পূব ফালে অৱতৰণ কৰিবলৈ অনুমতি দিয়া হৈছিল। কিন্তু পিছত পাইলটজনে নিজেই পশ্চিম ফালে অৱতৰণৰ অনুমতি বিচাৰিছিল। সেই অনুমতি তেওঁক দিয়া হৈছিল। সন্দেহ কৰা অনুসৰি বিমানখন অৱতৰণ কৰাৰ সময়তে পাইলটে নিয়ন্ত্ৰণ হেৰুৱাব পাৰে।এতিয়া ব্লেকবক্সটো উদ্ধাৰ হোৱাৰ পিছত দুৰ্ঘটনাৰ প্ৰকৃত কাৰণ জানিব পৰা যাব বুলি আশা কৰা হৈছে ।
Continue Reading
