ডিজিটেল ডেস্কঃ ভাৰতত নিৰাপদ নহয় সংবাদ মাধ্যম। বিশ্ব সংবাদ মাধ্যমৰ স্বাধীনতা সূচকাংকত আৰু অধিক অৱনমিত হৈছে ভাৰতৰ স্থান।
‘ৰিপ’ৰ্টাৰ্ছ উইদাউট বৰ্ডাৰছ’ বা আৰ এছ এফে প্ৰকাশ কৰা তালিকাত ১৮০খন দেশৰ ভিতৰত ১৬১ নম্বৰ স্থানত আছে ভাৰত।
উল্লেখ্য যে ২০২১ চনত ভাৰত ১৪২ নম্বৰত আছিল। এইবাৰ দেখা গ’ল যে ভাৰত এই তালিকাত ১৬১ নম্বৰলৈ নামি আহিছে।
আজি বিশ্ব সংবাদ মাধ্যম স্বাধীনতা দিৱস(World Press Freedom Index) উপলক্ষে এই তালিকাখন প্ৰকাশ পাইছে। প্ৰতিবেদনত কোৱা হৈছে যে ২০২৩ চনৰ ১ জানুৱাৰীৰ পৰা বিশ্বজুৰি এজনকৈ সাংবাদিকৰ মৃত্যু হৈছে। ১০ গৰাকী সাংবাদিক কাৰাবন্দী হৈছে।
প্ৰতিবেদন অনুসৰি, সাংবাদিকৰ ওপৰত হিংসা, ৰাজনৈতিক পক্ষপাতমূলক সংবাদ মাধ্যমকে ধৰি বিভিন্ন কাৰণে ভাৰতৰ এই পৰিস্থিতি।
পাকিস্তান, নেপাল, শ্ৰীলংকাৰ দৰে চুবুৰীয়া দেশসমূহ এই তালিকাত ভাৰততকৈ উন্নত স্থানত আছে। বিশ্ব সংবাদ মাধ্যমৰ স্বাধীনতা সূচকাংকত ১৫০ নম্বৰত আছে পাকিস্তান। নেপালৰ স্থান ৯৫ নম্বৰত। শ্ৰীলংকা ১৩৫ নম্বৰ স্থানত।
ম্যানমাৰে তালিকাত ১৭৩স্থান লাভ কৰে। বাংলাদেশৰ স্থান হৈছে ১৬৩।
তালিকাখনত নৰৱে, আয়াৰলেণ্ড আৰু ডেনমাৰ্ক একেবাৰে শীৰ্ষত আছে। একেবাৰে তলত আছে ভিয়েটনাম, চীন আৰু উত্তৰ কোৰিয়া।
Continue Reading
