ডিজিটেল ডেস্ক: পুনৰ প্ৰেক্ষাপটত প্ৰশান্ত কিশোৰ৷ বিগত এপ্ৰিলত নিৰ্বাচনী ৰণনীতিবিদগৰাকী কংগ্ৰেছত যোগদান কৰিব বুলি ওলোৱা খবৰে একপ্ৰকাৰ দেশৰ ৰাজনীতিত খলকনিৰ সৃষ্টি কৰিছিল৷ পাছলৈ কিশোৰে নিজেই আঁতৰিছিল প্ৰেক্ষাপটৰ পৰা৷ কংগ্ৰেছৰ নেতৃত্ব সলনিৰ প্ৰসংগৰে ছোনিয়া গান্ধী আৰু কংগ্ৰেছ নেতৃত্বৰ সৈতে কেইবালানিও বৈঠকত অংশ লৈছিল৷
প্ৰায় চাৰিমাহৰ অন্তত পুনৰ কংগ্ৰেছ নেতৃত্বৰে বৈঠকত মিলিত হৈছে প্ৰশান্ত কিশোৰ৷ আগন্তুক লোকসভা নিৰ্বাচনৰ বাবে প্ৰস্তুতিক লৈ নিৰ্বাচনী ৰণনীতিবিদগৰাকীয়ে কংগ্ৰেছ সভাপতি ছোনিয়া গান্ধীৰে বৈঠক অনুষ্ঠিত কৰিছে৷ বিগত পাঁচ দিনৰ ভিতৰত কালি তৃতীয়বাৰৰ বাবে ছোনিয়া গান্ধীৰে ৰুদ্ধদ্বাৰ বৈঠকত অংশ লয় প্ৰশান্ত কিশোৰে৷
ছোনিয়া গান্ধীৰ দিল্লীস্থ বাসভৱনত প্ৰশান্ত কিশোৰৰে বৈঠকত অংশ লয় কংগ্ৰেছৰ জ্যেষ্ঠনেতা কমল নাথ, দিগ্বিজয় সিং, মুকুল ৱাছনিক, কেচি বেণুগোপাল, জয়ৰাম ৰমেশ, একে এন্থনী, অম্বিকা ছোনী আৰু ৰণদীপ সূৰ্যেৱালাই৷
পূৰ্বেও পৰৱৰ্তী লোকসভা নিৰ্বাচনৰ বাবে কংগ্ৰেছৰ ওচৰত বিস্তৃত ৰণকৌশল দাখিল কৰিছিল প্ৰশান্ত কিশোৰে৷ কালিৰ বৈঠকৰ অন্তত কেচি বেণুগোপালে জনায় যে এসপ্তাহৰ ভিতৰত কংগ্ৰেছত প্ৰশান্ত কিশোৰৰ ভূমিকা কি হ’ব, সেয়া ৰাজহুৱা হ’ব৷
প্ৰশান্ত কিশোৰে পূৰ্বৰ বৈঠকত কংগ্ৰেছ নেতৃত্বৰ ওচৰত দাবী উত্থাপন কৰিছিল যে কংগ্ৰেছৰ শীৰ্ষ নেতৃত্ব অৰ্থাৎ সভাপতি পদটোত গান্ধী পৰিয়ালৰ বাহিৰৰ নেতাক অধিষ্ঠিত কৰাব লাগে৷ আৰু সেই দাবী এটা পৰ্যায়লৈ মানি লৈছিল কংগ্ৰেছে৷ আৰু শেহতীয়াকৈ ৰাহুল গান্ধীয়ে নিজে সভাপতি পদত নাথাকে বুলি ঘোষণা কৰাৰ পাছত সলনি হৈছে পৰিবেশ৷
সভাপতি পদৰ বাবে অশোক গেহলট, ভূপেশ বাঘেল আৰু শচীন পাইলটৰ নাম উচ্চাৰিত হৈছে৷ এনে সময়তে বৈঠকত অংশ লৈছে প্ৰশান্ত কিশোৰে৷ নিঃসন্দেহে প্ৰশান্ত কিশোৰৰ এই বৈঠকে কংগ্ৰেছক এক নতুন মাত্ৰা দিব পাৰে বুলি ধাৰণা কৰা হৈছে৷
Continue Reading
