৫ ডিচেম্বৰত বিয়া; গুৱাহাটীত যুৱতী সাংবাদিকৰ চৰমপন্থা

ডিজিটেল ডেস্ক: গুৱাহাটীত ঘটিছে এক চাঞ্চল্যকৰ ঘটনা। খ্ৰীষ্টানবস্তিত এগৰাকী যুৱতী সাংবাদিকে কৰিলে আত্মহত্যা। এটা পৰ্টেলত কৰ্মৰত আছিল যুৱতীগৰাকী। চৰম সিদ্ধান্ত লোৱা যুৱতীগৰাকীৰ নাম ৰিতুমণি ৰয়। ৫ ডিচেম্বৰত বিয়া আছিল ৰিতুমণিৰ।  বিয়ালৈ আছিল মাজত মাত্ৰ ১১দিন।

সকলো যো-জা চলি আছিল। চিঠিও ছপা কৰি উলিয়াই বিয়াৰ নিমন্ত্ৰণ দিছিল ৰিতুমণিয়ে। কিন্তু হঠাতে যেন কাল অমানিশা নামি আহিল। গুৱাহাটীত এটা সংবাদমাধ্যমত বাতৰি পৰিৱেশক হিচাপে কাম কৰা ৰিতুমণিয়ে জীৱনৰ সকলো মায়া মোহ ত্যাগ কৰি ল'লে চৰম সিদ্ধান্ত। গুৱাহাটীৰ কাহিলীপাৰাত ঘৰ যুৱতীগৰাকীৰ।

সংবাদ প্ৰতিষ্ঠানটোৰ ভিতৰতে উদ্ধাৰ হ'ল ৰিতুমণিৰ মৃতদেহ। পূৰ্বোদয় ভৱনৰ তৃতীয় মহলাত যুৱতীগৰাকীৰ মৃতদেহ উদ্ধাৰ হয়। কাৰ্যালয়ৰ কৰ্মচাৰীসকলে সদৰি কৰা তথ্য অনুসৰি, যোৱা ২৩নৱেম্বৰত পুৱাতেই ডিউটিলৈ আহিছিল যুৱতীগৰাকী। কিন্তু পুৱাতেই অফিচলৈ আহি নিশালৈকে ঘৰলৈ যোৱা নাছিল তেওঁ।।

অৱশেষত ৰাতিপুৱাৰ ভাগত তেওঁৰ নিথৰ দেহ উদ্ধাৰ হয় কাৰ্যালয়ৰ এটা কোঠাত। যুৱতীগৰাকীয়ে এখন চিঠিও লিখি থৈ গৈছে। চিঠিখনত লিখা হৈছে- সকলোৰে ভালৰ বাবেই এই সিদ্ধান্ত। সকলো ভালে থাকিব মোৰ অবিহনে। ছুইচাইড নোটত দেউতাকৰ ফোন নম্বৰটোও লিখি থৈ গৈছে তেওঁ।

ঘটনাস্থলীত আৰক্ষী উপস্থিত হৈ আৰম্ভ কৰিছে তদন্ত। ৰিতুমণিৰ পিতৃ এগৰাকী অৱসৰপ্ৰাপ্ত আৰক্ষী। জানিব পৰা মতে পৰিয়ালৰ সৈতে সম্পৰ্ক মধুৰ নাছিল ৰিতুমণি ৰয়ৰ।