ডিজিটেল ডেস্কঃ কিছুবছৰ পূৰ্বে ভাৰতীয় ক্ৰিকেটাৰ বিৰাট কোহলী নিৰামিষভোজী হৈ পৰিছিল। এসময়ত বাটাৰ চিকেন ভালপোৱা এজন ব্যক্তিয়ে নিজৰ প্ৰটিনৰ প্ৰয়োজনীয়তা পূৰণৰ বাবে নিৰামিষ খাদ্য নিৰ্বাচন কৰা দেখি বহু লোক আচৰিত হৈছিল। অৱশ্যে বিৰাট কোহলীয়ে নিজৰ ফিটনেছক এক বেলেগ স্তৰলৈ লৈ যোৱাৰ বাবে এই কাম কৰাটো প্ৰয়োজনীয় আছিল।
বিৰাটে নিজেই বহুবাৰ উল্লেখ কৰিছে যে আমিষ খাদ্য ত্যাগ কৰিলে ফিটনেছ উন্নত হোৱাত কেনেদৰে সহায় হৈছে। কেইবছৰমান আগতে বিৰাটে ছাৰ্ভাইকেল স্পাইনৰ সমস্যাৰ বাবে নন-ভেজ এৰি দিয়াৰ কথা প্ৰকাশ কৰিছিল। যিহেতু তেওঁৰ শৰীৰত অত্যধিক ইউৰিক এচিড উৎপাদন হৈছিল, সেয়েহে তেওঁৰ খাদ্যাভ্যাসত কিছু পৰিৱৰ্তন কৰিবলগীয়া হৈছিল আৰু এইটো আছিল অন্যতম ডাঙৰ পৰিৱৰ্তন।
অৱশ্যে শেহতীয়াকৈ বিৰাট কোহলীয়ে তেওঁৰ ইনষ্টাগ্ৰাম ষ্ট’ৰীত এটা কাহিনী পোষ্ট কৰিছিল, য’ত লিখা আছিল যে তেওঁ ম’ক চিকেন টিক্কা খাইছে। ইয়াৰ পাছত তেওঁৰ অনুৰাগীসকল বিভ্ৰান্ত হৈ পৰিল যে বিৰাটে পুনৰ নন-ভেজ বা নন-ভেজিটেৰিয়ান খাদ্য খাবলৈ আৰম্ভ কৰিছে বুলি ভাবিবলৈ আৰম্ভ কৰে, কিন্তু বিৰাটৰ এই কাহিনীটোৰ আন এটা অন্য দিশ আছে, যিটো তেওঁৰ বেছিভাগ অনুৰাগীয়ে বুজিব পৰা নাছিল। আচলতে বিৰাটে শ্বেয়াৰ কৰা ইনষ্টাগ্ৰাম ষ্ট’ৰীত তেওঁ খাইছে ‘মক চিকেন টিক্কা’, যিটো পশু ভিত্তিক নহয়, উদ্ভিদ ভিত্তিক খাদ্যহে। সেয়েহে এই চিকেন নিৰামিষ খাদ্য।সেয়ে বিৰাট কোহলীয়ে নিজৰ লাখ লাখ অনুৰাগীৰ সৈতে কৌতুক কৰা বিষয়টোৱে এতিয়া ছ’চিয়েল মিডিয়াত চৰ্চাৰ বিষয় হৈ পৰিছে।
Continue Reading
