ডিজিটেল ডেস্কঃ প্ৰিন্সেছ ডায়েনাৰ এটা বেঙুনীয়া গাউন নিলাম কৰিবলৈ লোৱা হৈছে। নিলাম প্ৰক্ৰিয়া অহা ২৭ জানুৱাৰীত নিউয়ৰ্কৰ চথে’বীত অনুষ্ঠিত হ'ব।
ৱেলছৰ ৰাজকুমাৰীৰ এই গাউনটো বেঙুনীয়া ৰেচম আৰু মখমলৰ দ্বাৰা তৈয়াৰ কৰা হৈছে। এই পোছাকৰ ঐতিহাসিক তাৎপৰ্য আছে। ডায়েনাই প্ৰথমবাৰৰ বাবে ১৯৯১ চনত তেওঁৰ এখন ৰয়েল পৰ্টে’ইট অংকন কৰিবলৈ এই গাউনটো পিন্ধিছিল। তাৰ পিছত ১৯৯৭ চনত, ডায়েনাৰ মৃত্যুৰ কেইদিনমান আগতে তেওঁ এই বেঙুনীয়া গাউনটো পিন্ধি বিখ্যাত মাহেকীয়া আলোচনী 'ভেনিটি ফেয়াৰ'ৰ বাবে ফটো উঠিছিল৷
ৰাজকুমাৰী ডায়েনাৰ মৃত্যুৰ ২৫ বছৰ পাৰ হ'ল। কিন্তু তেওঁ এতিয়াও চৰ্চিত হৈ আছে। ডায়েনাৰ ব্যক্তিগত জীৱনৰ বিষয়ে আলোচনা অব্যাহত আছে। একে সময়তে, ডায়েনাৰ পোছাকৰ বিষয়েও আলোচনা হৈ আছে। ফেশ্বন জগতেও তেওঁ পিন্ধা পোছাকৰ শৈলী অনুসৰণ কৰে।
এই মাহৰ শেষৰ ফালে নিলাম হ'বলগীয়া গাউনটোৰ মূল্য ৮০,০০০ ৰ পৰা ১,২০,০০০ ডলাৰৰ ভিতৰত হ'ব বুলি অনুমান কৰা হৈছে। যাৰ মূল্য ভাৰতীয় টকাত ৬৫ লাখৰ পৰা ৮২ লাখ টকাৰ ভিতৰত। ইয়াৰ আগতে, ডায়েনাৰ ৮০খনকৈ কাপোৰ নিলাম কৰা হৈছিল আৰু কেইবাকোটি টকা সংগ্ৰহ কৰা হৈছিল।
এই ধনসমূহ বিভিন্ন চেৰিটেবুল ট্ৰাষ্ট আৰু ৰয়েল মাৰ্চডেন হস্পিটেলৰ পুঁজিলৈ দান কৰা হৈছিল। এইবাৰো ডায়েনাৰ বেঙুনীয়া গাউনটো প্ৰায় কেইবা কোটি টকাত নিলাম কৰা হ'ব বুলি আশা কৰা হৈছে।
Continue Reading
