নিৰ্বাচনী অধিসূচনাৰ পূৰ্বেই বলবৎ হোৱাৰ পথত ‘কা’! বলবৎকৰণত কোনেও বাধা দিব নোৱাৰে বুলি হুংকাৰ অমিত শ্বাহৰ

উল্লেখযোগ্য যে আৰু এসপ্তাহৰ ভিতৰতে লোকসভা নিৰ্বাচনৰ তাৰিখ ঘোষণা কৰিব নিৰ্বাচন আয়োগে। গতিকে নিৰ্বাচনী অধিসূচনা জাৰি হোৱাৰ পূৰ্বেই এই সপ্তাহটোৰ ভিতৰতে ‘কা’ বলবৎ হোৱাৰ আছে পূৰ্ণ সম্ভাৱনা। ‘কা’ বলবৎ হ’লে দেশৰ প্ৰান্তে-প্ৰান্তে আন্দোলনৰ পৰিৱেশ সৃষ্টি হোৱাটোও নিশ্চিত হৈ পৰিছে। ইতিমধ্যে অসমত কেইবাটাও জাতীয় সংগঠনে ‘কা’ক জাতিধ্বংসী আইন আখ্যা দিছে।  সদৌ অসম ছাত্ৰ সন্থাই ‘কা’ বলবৎকৰণৰ পূৰ্বৰ দৰেই একমুখে বিৰোধিতা কৰিছে। আজি ‘কা’ৰ বিৰুদ্ধে ৰাজ্যজুৰি বাইক ৰেলী উলিয়াই আছুৰ নেতা–কৰ্মীসকলে। বাইক ৰেলীত আছুৰ সভাপতি–সম্পাদকৰ লগতে মুখ্য উপদেষ্টা সমুজ্জ্বল ভট্টাচাৰ্যয়ো অংশগ্ৰহণ কৰে। ‘কা’ৰ বিৰুদ্ধে বিগত কেইটামান দিনত আন্দোলন চলাই গৈছে অসম জাতীয়তাবাদী যুৱ ছাত্ৰ পৰিষদে। কৃষক মুক্তি সংগ্ৰাম সমিতিয়েও ‘কা’ৰ বিৰুদ্ধে গঢ়ি তুলিছে আন্দোলন। কোনোপধ্যে ‘কা’ মানি নলয় বুলি হুংকাৰ দিছে কৃষক মুক্তিৰ নেতৃবৰ্গই। ‘কা’ বলবতক লৈ পশ্চিমবংগৰ পৰিৱেশো অশান্ত হৈ পৰাৰ আছে পূৰ্ণ সম্ভাৱনা। পশ্চিমবংগৰ শাসকীয় তৃণমূল কংগ্ৰেছে জোৰদাৰ বিৰোধিতা কৰি আছে ‘কা’ বলবৎকৰণৰ। জীয়াই থকালৈকে পশ্চিমবংগত ‘কা’ বলবৎ হ’বলৈ নিদিয়ে বুলি হুংকাৰ দি আহিছে মমতা বেনাৰ্জীয়ে। বিজেপিয়ে বংগৰ ভোটবেংকৰ ৰাজনীতিৰে লোকসভা নিৰ্বাচনৰ পূৰ্বে বলৱৎ কৰিবলৈ বিচাৰিছে ‘কা’। মূলতঃ পশ্চিমবংগত নিৰ্বাচনী সফলতা অৰ্জন কৰাৰ বাবেই বিজেপিয়ে ‘কা’ বলৱৎ কৰিব বিচাৰিছে। বাৰম্বাৰ এনে মন্তব্য কৰি আক্ৰমণাত্মক হৈ পৰিছে মমতা। দৰাচলতে পশ্চিমবংগৰ মটুৱা জনগোষ্ঠীৰ ভোট বেংক সৃষ্টিৰ বাবেই বংগত ‘কা’ বলবৎ কৰিব বিচাৰিছে মোদী চৰকাৰে। বাংলাদেশৰ পৰা ভাৰতলৈ প্ৰব্ৰজন কৰিছিল এই হিন্দু ধৰ্মীয় মটুৱা জনগোষ্ঠীৰ লোকসকলে। বাংলাদেশত ধৰ্মীয় নিৰ্যাতনৰ বলি হৈ মটুৱাসকলৰ যথেষ্টসংখ্যকে প্ৰৱেশ কৰি আহিছে পশ্চিমবংগত। কিন্তু ভাৰতৰ নাগৰিকত্ব লাভ কৰিব নোৱৰাৰ বাবেই বিভিন্ন ক্ষেত্ৰত প্ৰচুৰ অসুবিধাৰ সন্মুখীন হৈছে তেওঁলোক। এতিয়া কেইবালাখ মটুৱা লোকক ‘কা’ৰ অধীনত নাগৰিকত্ব প্ৰদান কৰি ভোটবেংক কৰিবলৈ বিচাৰিছে মোদী চৰকাৰে। ‘কা’ বলবৎকৰণে পূৰ্বৰে পৰা ভাৰতত থকা মটুৱাসকলৰ ভোট বিজেপিৰ পক্ষলৈ আনিব বুলি ধাৰণা লৈছে মোদী চৰকাৰে। আনহাতে নতুনকৈ নাগৰিকত্ব লাভ কৰা মটুৱা লোকৰ ভোটে বংগৰ ক্ষমতা দখলত সহায় কৰিব বুলি আশাবাদী হৈছে বিজেপি। গতিকে ‘কা’ বলৱৎকৰণ বিজেপিৰ বাবে হৈ পৰিছে এবিধ নিৰ্বাচনী অস্ত্ৰ। এই অস্ত্ৰবিধেৰে বংগত মমতা বেনাৰ্জীক প্ৰতিহত কৰাৰ ব্লুপ্ৰিণ্ট দলটোৰ।