নিৰ্বাচনী পেকেজ লৈ মণিপুৰ আৰু ত্ৰিপুৰাত প্ৰধানমন্ত্ৰী নৰেন্দ্ৰ মোদী

ডিজিটেল ডেস্কঃ মণিপুৰ আৰু ত্ৰিপুৰাবাসীৰ উন্নয়নৰ বাবে কেইবাটাও অভিলাষী উন্নয়নমূলক প্ৰকল্পৰ শুভ উদ্বোধনৰ উদ্দেশ্যে আজি মণিপুৰ আৰু ত্ৰিপুৰা ভ্ৰমণ কৰে প্ৰধানমন্ত্ৰী নৰেন্দ্ৰ মোদীয়ে। প্ৰধানমন্ত্ৰীয়ে আজি ইম্ফলত চাৰি হাজাৰ আঠ শ কোটি টকাৰ মুঠ ২২টা প্ৰকল্পৰ শুভ উদ্বোধন কৰে। আগৰতলাত মহাৰজা বীৰ বিক্ৰম বিমান বন্দৰত নতুন একত্রিত টাৰ্মিনেল ভৱনৰ উদ্বোধন কৰে। লগতে মণিপুৰত ১৮৫০ কোটি টকা ব্যয়েৰে ১৩টা প্ৰকল্প আৰু ২৯৫০ কোটি টকাৰ ৯টা প্ৰকল্পৰো উদ্বোধন কৰে।

আনহাতে ১৭০০ কোটি টকা ব্যয় সাপেক্ষে পাঁচটা ৰাষ্ট্ৰীয় ঘাইপথ প্ৰকল্পৰো আধাৰশিলা স্থাপন কৰিব প্ৰধানমন্ত্ৰী নৰেন্দ্ৰ মোদীয়ে বুলি জানিবলৈ দিয়ে প্ৰধানমন্ত্ৰী কাৰ্যালয়ে। প্ৰধানমন্ত্ৰী মোদীয়ে আজি উদ্বোধন কৰা এই প্ৰকল্পসমূহৰ অধিকাংশই হৈছে পথ আন্তঃগাঁথনি, খোৱাপানী যোগান, নগৰ উন্নয়ন, শিক্ষা, স্বাস্থ্য আৰু দক্ষতা বিকাশ। প্ৰধানমন্ত্ৰীগৰাকীৰ এই উদ্বোধনী কাৰ্যসূচীক লৈ উৎফুলিত হৈ পৰিছে মণিপুৰ আৰু ত্ৰিপুৰাবাসী। কিন্তু বিৰোধীয়ে চোকা সমালোচনা কৰি কয় যে এয়া কেৱল নিৰ্বাচনী টোপ, কাৰণ মণিপুৰ আৰু ত্ৰিপুৰা বিধানসভা নিৰ্বাচন সমাগত।