ডিজিটেল ডেস্কঃ ঘৰুৱা ক্ৰিকেটত ইতিহাস সৃষ্টি কৰিলে জয়দেৱ উনাড়কাটে। ৰঞ্জীৰ ট্ৰফীত দিল্লীৰ বিৰুদ্ধে উনাড়কাটৰ দল সৌৰাষ্ট্ৰই খেলা মেচখনত ২ অভাৰত পাঁচটা উইকেট দখল কৰিলে মিডিয়াম ফাষ্টবলাৰগৰাকীয়ে।
জয়দেৱ উনাড়কাটৰ এই প্ৰদৰ্শনৰ দ্বাৰাই দিল্লীক পৰাস্ত কৰে সৌৰাষ্ট্ৰই। মেচখনৰ প্ৰথম অভাৰতে হেট্ৰিক অৰ্জন কৰে বলাৰগৰাকীয়ে। তাতেই এটা নতুন অভিলেখৰ সৃষ্টি হয়। ৰঞ্জীৰ ৮৮ বছৰৰ ইতিহাসত প্ৰথমবাৰৰ বাবে এজন বলাৰে প্ৰথম অভাৰত হেট্ৰিক অৰ্জন কৰে।
মেচখনত দুটা অভাৰতে ৫ টা উইকেট দখল কৰে উনাড়কাটে। ফলস্বৰূপে দিল্লীয়ে মাত্ৰ ১০ ৰাণত সাতটা উইকেট হেৰুৱায়। অৱশ্যে তৰুণ তাৰকা হৃত্বিকৰ ৬৪ ৰাণৰ ইনিংছটোৰ আধাৰত ১৩৩ ৰাণ সংগ্ৰহ কৰিবলৈ সক্ষম হয় দিল্লীয়ে।
উনাদকাটে তেওঁৰ প্ৰথম অভাৰৰ তৃতীয়, চতুৰ্থ আৰু পঞ্চম বলত তিনিটা উইকেট দখল কৰে। ধ্ৰুৱ শোৰে, বৈভৱ ৰাৱাল আৰু দিল্লীৰ অধিনায়ক যশ ধুলে উনাড়কাটৰ বলত পেভিলিয়নলৈ উভতি যায়।
উল্লেখ্য যে ইয়াৰ পূৰ্বে কৰ্ণাটকৰ বিনয় কুমাৰৰ ৰঞ্জীত হেট্ৰিক লোৱাৰ অভিলেখ আছে। উনাড়কাটে প্ৰথম অভাৰত হেট্ৰিক লৈ ৰঞ্জীৰ ইতিহাসত সোণালী আখৰত তেওঁৰ নাম খোদিত কৰি ৰাখিলে।
Continue Reading
