নতুন চৰকাৰৰ সংসদৰ অধিৱেশনৰ দিন ঘোষণা, কেতিয়া অনুষ্ঠিত হ’ব লোকসভা-ৰাজ্যসভাৰ প্ৰথম অধিৱেশন?

কেন্দ্ৰীয় মন্ত্ৰী কিৰেন ৰিজিজুৱে বুধবাৰে এক্স-হেণ্ডলত কয় যে দহ দিনীয়া সংসদৰ অধিৱেশনৰ প্ৰথম তিনিদিনত নিৰ্বাচিত সাংসদসকলে শপত গ্ৰহণ কৰাৰ লগতে  চিনাকি পৰ্ব অনুষ্ঠিত হ’ব। ইয়াৰ পিছত ২৭ জুনত সংসদত ৰাষ্ট্ৰপতিয়ে ভাষণ দিব। ৰাষ্ট্ৰপতি দ্ৰৌপদী মুৰ্মুৱে তেওঁৰ ভাষণত আগন্তুক ৫ বছৰত চৰকাৰৰ পৰিকল্পনাৰ ৰূপৰেখা দাঙি ধৰিব। ইয়াৰ পিছত প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰপতিৰ ভাষণৰ ধন্যবাদসূচক প্ৰস্তাৱ পাঠ কৰিব। প্রধানমন্ত্রীৰ ধন্যবাদসূচক প্রস্তাৱক লৈ বিতৰ্কত  অংশগ্রহণ কৰিব বিৰোধী শিবিৰে৷ লগতে এই অধিবেশনতে  লোকসভাৰ অধ্যক্ষক নিৰ্বাচিত কৰা হ’ব।সংসদৰ অধিৱেশনৰ সূচী ঘোষণা কৰি ৰিজিজুৱে কয় যে সংসদ চলাবলৈ সকলোৰে অৱদানৰ প্ৰয়োজন। তেওঁ কয় ‘আমি জনসাধাৰণৰ আদেশ মানি চলিব লাগিব। সাংসদসকলক চৰকাৰ গঠনৰ বাবে ৰাইজে দায়িত্ব  দিছে, চৰকাৰখন ভালদৰে চলাব লাগিব। যিসকলক বিৰোধী দল গঠনৰ দায়িত্ব দিয়া হৈছে, তেওঁলোকে এটা ইতিবাচক বিৰোধীৰ ভূমিকা পালন কৰিব লাগিব। চৰকাৰেই হওক বা বিৰোধীয়েই হওক, সংসদ চলাবলৈ সকলোৰে অৱদানৰ প্ৰয়োজন।’’

ৰিজিজুৱে লগতে কয়- ’’সংসদত প্ৰতিজন সদস্যৰ ভূমিকা আছে। এজন সাংসদ থাকিলেও সৰু দলৰ ভূমিকা ডাঙৰ দলৰ দৰেই। সংসদ সুচাৰুৰূপে চলাবলৈ প্ৰতিজন সদস্যৰ অৱদানৰ প্ৰয়োজন। মই বিচাৰো যে সকলো দল একত্ৰিত হৈ বিশ্বৰ আটাইতকৈ ডাঙৰ জন সংসদখন চলাওক৷ ৰাজ্যসভাৰ অধ্যক্ষ, লোকসভাৰ অধ্যক্ষ আৰু প্ৰধানমন্ত্ৰীৰ  নিৰ্দেশনাত প্ৰতিটো দলে নিয়ম অনুসৰি সুযোগ পাব।’ ৰিজিজুৱে কয়, ‘এটা শক্তিশালী গণতন্ত্ৰৰ বাবে এখন সক্ৰিয় সংসদৰ প্ৰয়োজন।

ইপিনে ৰাজনৈতিক মহলে অনুমান কৰিছে যে বিৰোধী শিবিৰে অধিৱেশনৰ  আৰম্ভণিৰে পৰাই মোদী চৰকাৰৰ বিৰুদ্ধে যুদ্ধ ঘোষণাৰ প্ৰস্তুতি আৰম্ভ কৰিব পাৰে। মন কৰিবলগীয়া যে ২০১৯ চনৰ এন ডি এ চৰকাৰ আৰু ২০২৪ চনৰ এন ডি এ চৰকাৰৰ মাজত পাৰ্থক্য বৃহৎ আছে। যোৱাবাৰ ৩০৩খন আসনত একক সংখ্যাগৰিষ্ঠতাৰে ক্ষমতালৈ আহিছিল মোদী চৰকাৰ। ফলত সংসদত সংখ্যালঘু বিৰোধী শিবিৰটোৱে গুৰুত্ব লাভ কৰিব পৰা নাছিল। মোদী চৰকাৰে যোৱা কাৰ্যকালত সেয়ে ইখনৰ পিছত সিখন বিধেয়ক সংখ্যাৰ জোৰেৰে গৃহীত কৰিব পাৰিছিল। । এইবাৰ ২৩৪খন আসনেৰে সংসদত বহিব বিৰোধী শিবিৰ। ফলত মোদী চৰকাৰে আলোচনাৰ মাজৰে বিধেয়ক  গৃহীত কৰিবলৈ বাধ্য হ’ব বুলি ধাৰণা কৰা হৈছে।