চতুৰ্থবাৰৰ বাবে অন্ধ্ৰপ্ৰদেশৰ মুখ্যমন্ত্ৰী হিচাবে শপতগ্ৰহণ কৰিলে এন চন্দ্ৰবাবু নাইডুৱে, উপস্থিত থাকিল মোদী-শ্বাহকে ধৰি বহু গণ্য-মান্য ব্যক্তি

ৰাজ্য খনৰ মুঠ ১৭৫টা বিধানসভা সমষ্টিৰ ভিতৰত এন ডি এই  ১৬৪টা সমষ্টিত জয়লৈাভ কৰিছে। ইয়াৰে  টি ডি পি লাভ কৰে ১৩৫খন আসন , জেএছপিয়ে ২১খন আৰু বিজেপিয়ে ৮খন আসন লাভ কৰাৰ বিপৰীতে ৱাইএছআৰ কংগ্ৰেছ পাৰ্টিয়ে ১১খন আসনত বিজয়ী হয়। আজি চতুৰ্থবাৰৰ বাবে মুখ্যমন্ত্ৰী হিচাবে শপতগ্ৰহণ কৰা ৭৪ বছৰীয়া চন্দ্ৰবাবু নাইডুৰ জন্ম হৈছিল ১৯৫০ চনৰ ২০ এপ্ৰিলত অন্ধ্ৰ প্ৰদেশৰ চিত্তুৰ জিলাৰ নৰৱৰী পল্লেত। এটা কৃষক পৰিয়ালত জন্মগ্ৰহণ কৰা নাইডুৰ সম্পূৰ্ণ নাম  নৰা চন্দ্ৰবাবু নাইডু।চন্দ্ৰবাবু নাইডুৱে ১৯৯৫ চনৰ ১ ছেপ্টেম্বৰৰ পৰা ২০০৪ চনৰ ১৩ মে’লৈকে  আঠ বছৰ, আঠ মাহ  ১৩ দিন  অন্ধ্ৰ প্ৰদেশৰ মুখ্যমন্ত্ৰী হিচাপে কাৰ্যনিৰ্বাহ কৰিছে। ২৮ বছৰ বয়সতে ১৯৭৮ চনত  টি অঞ্জয়ৰ মন্ত্ৰীসভাত প্ৰথমবাৰৰ বাবে চিনেমেট’গ্ৰাফী বিভাগৰ মন্ত্ৰী হিচাপে নিযুক্তি পোৱা চন্দ্ৰবাবু আছিল কনিষ্ঠতম মন্ত্ৰী ।

সাতবাৰৰ বিধায়ক চন্দ্ৰবাবু নাইডুৱে  ২০০৪ চনৰ পৰা ২০১৪ চনৰ ভিতৰত অন্ধ্ৰ প্ৰদেশত সৰ্বাধিক কালৰ বাবে বিৰোধী নেতা হিচাপে অভিলেখ গঢ়িছিল।চন্দ্ৰবাবুৱে  শ্ৰী ভেংকটেশ্বৰ বিশ্ববিদ্যালয়ৰ পৰা অৰ্থনীতিত স্নাতকোত্তৰ ডিগ্ৰী লাভ কৰিছিল।তেওঁ  ১৯৭৫ চনত যুৱ কংগ্ৰেছত যোগদান কৰি জন্মস্থান চন্দ্ৰগিৰি সমষ্টিৰ পৰা ১৯৭৮ চনত প্ৰথমবাৰৰ বাবে বিধায়ক হিচাপে নিৰ্বাচিত হৈছিল।চন্দ্ৰবাবুৱে  ৰূপালী পৰ্দাৰ কিংবদন্তি এন টি ৰামা ৰাওৰ দ্বিতীয় কন্যা ভুৱনেশ্বৰীক ১৯৮০ চনত বিয়া কৰাইছিল।১৯৯৪ চনত এন টি আৰৰ মন্ত্ৰীসভাত বিত্ত আৰু ৰাজহ মন্ত্ৰী হৈছিল চন্দ্ৰবাবু।পৰৱৰ্তী সময়ত চন্দ্ৰবাবুৱে  টিডিপিৰ সভাপতি হৈছিল আৰু ১৯৯৬ চনৰ জানুৱাৰী মাহত দলটোৰ সম্পূৰ্ণ নিয়ন্ত্ৰণ লাভ কৰিছিল।মুখ্যমন্ত্ৰী হিচাপে চন্দ্ৰবাবুৱে অৰ্থনীতি আৰু শাসন দুয়োটা দিশতে সংস্কাৰৰ সূচনা কৰিছিল । তেওঁ  ই-শাসন, ই-সেৱাৃআৰু নাগৰিক চনদৰ দৰে অগ্ৰণী পদক্ষেপ আৰম্ভ কৰিছিল।তেওঁ ৰাজ্যৰ সৰ্বাংগীন উন্নয়নৰ বাবে ভিজন-২০২০ নীতিৰ নথি  কাৰ্যকৰী কৰিছিল। মুকুতা আৰু বিৰিয়ানীৰ বাবে বিখ্যাত চহৰ হায়দৰাবাদক   চন্দ্ৰবাবুৱে তথ্য প্ৰযুক্তিৰ এক প্ৰধান কেন্দ্ৰলৈ ৰূপান্তৰিত কৰি মাইক্ৰ’ছফ্ট, উইপ্ৰ’, গুগল আদিক চহৰ খনলৈ আকৰ্ষণ কৰিছিল।