ডিজিটেল ডেস্ক: ন্যায়াধীশ সন্দীপ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়া হৈছে৷ কেন্দ্ৰীয় চৰকাৰে আজি ৰাজস্থান উচ্চ ন্যায়ালয়ৰ ন্যায়াধীশ সন্দীপ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ বাবে যাৱতীয় অনুমোদন প্ৰদান কৰে।
আইন আৰু ন্যায় মন্ত্ৰণালয়ৰ ৱেবছাইটত এই সন্দৰ্ভত জাননী পোষ্ট কৰা হৈছিল। জাননীখনত এইধৰণে উল্লেখ কৰা হৈছে- ‘ভাৰতৰ সংবিধানৰ ২১৭ নং অনুচ্ছেদৰ (১) দফা (১)ৰ দ্বাৰা প্ৰদান কৰা ক্ষমতা ব্যৱহাৰ কৰি ৰাষ্ট্ৰপতিয়ে ৰাজস্থান উচ্চ ন্যায়ালয়ৰ ন্যায়াধীশ সন্দীপ মেহতাক গুৱাহাটী৷উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াত আনন্দিত হৈছে, যিটো তেওঁ তেওঁৰ কাৰ্যালয়ৰ দায়িত্ব গ্ৰহণ কৰাৰ তাৰিখৰ পৰা কাৰ্যকৰী হৈছে৷’
ন্যায়াধীশ মেহতাক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ পৰামৰ্শ উচ্চতম ন্যায়ালয়ৰ কলেজিয়ামে ৮ ফেব্ৰুৱাৰীত দিছিল। ন্যায়াধীশ মেহতাক ২০১১ চনৰ ৩০ মে'ত ৰাজস্থান উচ্চ ন্যায়ালয়ত ন্যায়াধীশ হিচাপে নিযুক্তি দিয়া হৈছিল আৰু তেওঁ ২০২৫ চনৰ ১০ জানুৱাৰীত অৱসৰ লোৱাৰ কথা আছে।
কলেজিয়ামে আগতে ন্যায়াধীশ কে বিনোদ চন্দ্ৰনক গুৱাহাটী উচ্চ ন্যায়ালয়ৰ মুখ্য ন্যায়াধীশ হিচাপে নিযুক্তি দিয়াৰ সংকল্প লৈছিল।
ন্যায়াধীশ মেহতাই বিচাৰপীঠলৈ উন্নীত হোৱাৰ পূৰ্বে ১৯৮৬ চনৰ ৮ আগষ্টত অধিবক্তা হিচাপে কৰ্মজীৱন আৰম্ভ কৰিছিল। তেওঁ বিচাৰ আদালত, উচ্চ ন্যায়ালয়ৰ লগতে উচ্চতম ন্যায়ালয়তো অনুশীলন কৰিছিল।
তেওঁ ২০০৪ চনৰ পৰা ২০০৫ চনলৈ ৰাজস্থানৰ বাৰ কাউন্সিলৰ উপাধ্যক্ষ আৰু ২০১০ চনত অধ্যক্ষ হিচাপে কাৰ্যনিৰ্বাহ কৰিছিল।
Continue Reading
