ডিজিটেল ডেস্কঃ অবৈধ ধনৰ লেন-দেন সম্পৰ্কীয় গোচৰত ঝাৰখণ্ডৰ মুখ্যমন্ত্ৰী হেমন্ত সোৰেনলৈ ইডিয়ে চমন জাৰি কৰিছে। এজনৰ পাছত আন এজন নেতালৈ চমন জাৰি কৰিছে ইডিয়ে। ভূমি কেলেংকাৰীত জড়িত হৈ পৰিছে হেমন্ত সোৰেনৰ নাম।
১৪ আগষ্টত এই সম্পৰ্কে সোধা-পোছাৰ বাবে ইডিয়ে মাতি পঠিয়াইছে হেমন্ত সোৰেনক। ইডিয়ে অভিযোগ কৰিছে যে কেৱল মুখ্যমন্ত্ৰী হেমন্ত সোৰেনেই নহয়, তেওঁৰ পৰিয়ালৰ সদস্যসকলো ভূমি কেলেংকাৰীত জড়িত হৈ আছে।
উল্লেখ্য যে এতিয়ালৈকে এই গোচৰটোত ১৩ জন লোকক গ্ৰেপ্তাৰ কৰা হৈছে।
ৰাঁচীৰ ভূমি কেলেংকাৰী গোচৰ তদানীন্তন ৰাঁচী বিভাগীয় আয়ুক্ত নীতিন মদন কুলকাৰ্ণীৰ প্ৰতিবেদনৰ ভিত্তিত এই তদন্ত কৰা হৈছে। সেনাই দখল কৰা ভূমিৰ তদন্ত কৰাৰ পিছত আয়ুক্তজনে চৰকাৰক এখন প্ৰতিবেদন দাখিল কৰিছিল।
ভূমি কেলেংকাৰী গোচৰত ইয়াৰ পূৰ্বে ইডিয়ে ২০২২ চনৰ ১৮ নৱেম্বৰত মুখ্যমন্ত্ৰী হেমন্ত সোৰেনক ১০ ঘন্টা ধৰি জেৰা কৰিছিল। ইয়াৰ পাছত এইবাৰ পুনৰ তেওঁক চমন জাৰি কৰা কথাটোৱে যথেষ্ট গুৰুত্ব বহন কৰিছে।
Continue Reading
