ডিজিটেল ডেস্ক: উত্তৰাখণ্ডত অব্যাহত আছে উত্তেজনা। ৮ ফেব্ৰুৱাৰীত উত্তৰাখণ্ডৰ হালদৱানিত অবৈধ মাদ্ৰাছা আৰু এক নামাজগৃহত প্ৰশাসনে চলোৱা উচ্ছেদৰ পাছতে সূত্ৰপাত ঘটিছিল হিংসাৰ। হাজাৰ হাজাৰ উত্তেজিত লোকে আৰক্ষী–প্ৰশাসনৰ ওপৰত চলাইছিল আক্ৰমণ।
এই ঘটনাত এতিয়ালৈ ৬জন লোকে প্ৰাণ হেৰুওৱাৰ বিপৰীতে আহত হৈছে ৩০০ৰো অধিক আৰক্ষী–প্ৰশাসনৰ লোক। ইতিমধ্যে ৫০ ঘণ্টা উকলিল এই ঘটনাৰ। তাৰ পাছতো সমগ্ৰ অঞ্চলতে কৰ্তন কৰি ৰখা হৈছে ইণ্টাৰনেটসেৱা। ঘটনা সংঘটিত হোৱা বনভুলপূৰাত বিগত ৩দিন ধৰি অব্যাহত আছে সান্ধ্য আইন। অৱশ্যে তাৰ মাজতে পৰিস্থিতি নিয়ন্ত্ৰণত আছে নৈনীতাল, বৰেলীৰ দৰে অঞ্চলৰ।
বনভুলপূৰাত শিক্ষানুষ্ঠান, দোকান–পোহাৰ বন্ধ থকাৰ বিপৰীতে বৰেলী, নৈনীতালত স্বাভাৱিক হৈ আছে জীৱন যাত্ৰা। অৱশ্যে প্ৰয়োজন অবিহনে জনসাধাৰণক ঘৰৰ বাহিৰলৈ ওলাই নাহিবলৈ আহ্বান জনাইছে প্ৰশাসনে। এইক্ষেত্ৰত দণ্ডাধীশৰ অনুমতি অনিবাৰ্য কৰিছে প্ৰশাসনে।
ইতিমধ্যে ঘটনাৰ সৈতে জড়িত থকাৰ অভিযোগত ৫ হাজাৰ দুষ্কৃতিকাৰীৰ বিৰুদ্ধে গোচৰ ৰুজু কৰিছে প্ৰশাসনে। আৰক্ষীয়ে গ্ৰেপ্তাৰ কৰিছে ৪ গৰাকী লোকক। তাৰ মাজতে উত্তৰাখণ্ডৰ ৰাজ্যপালক সাক্ষাৎ কৰিছে বিৰোধী মৰ্চা ইণ্ডিয়া আৰু নাগৰিক সমাজৰ এক উচ্চস্তৰীয় দলে। উচ্চ ন্যায়ালয়ৰ ন্যায়াধীশৰ জৰিয়তে সমগ্ৰ ঘটনাৰ তদন্তৰ দাবী জনাইছে দলটোৱে। ইতিমধ্যে হালদৱানিৰ বনভূলপূৰা আৰক্ষী থানাৰ অধীনৰ অঞ্চলত ঘৰতে আবদ্ধ হৈ পৰিছে ৭০ হাজাৰৰো অধিক বাসিন্দা। ইতিমধ্যে আৰক্ষীয়ে ছীল কৰি দিছে ২ কিলোমিটাৰ ব্যাসাৰ্ধৰ অঞ্চল। অব্যাহত আছে সান্ধ্য আইন।
দুৰ্বৃত্তক দেখা মাত্ৰেই গুলীওৱাৰ নিৰ্দেশ প্ৰশাসনৰ। তাৰ মাজতে অত্যাৱশ্যকীয় সামগ্ৰীৰ বাবে হাহাকাৰ আবদ্ধ হৈ থকা লোকসকলৰ। ইতিমধ্যে দুষ্কৃতিকাৰীৰ বিৰুদ্ধে কঠোৰ ব্যৱস্থা গ্ৰহণৰ হুংকাৰ দিয়া উত্তৰাখণ্ডৰ মুখ্যমন্ত্ৰীয়ে ৰাজ্যখনৰ শেহতীয়া পৰিস্থিতি সন্দৰ্ভত প্ৰকাশ কৰিছে নিজৰ প্ৰতিক্ৰিয়া৷
Continue Reading
