ডিজিটেল ডেস্কঃ দশমবাৰৰ অষ্ট্ৰেলিয়ান অ’পেন জয় কৰিলে ন’ভাক জ’কভিচে। বিগত কেইখনমান মেচত খেলা একেটা আক্ৰমণাত্মক শৈলী বজাই ৰাখি অষ্ট্ৰেলিয়ান অ’পেনৰ ফাইনেলতো জ’কভিচে ষ্টেফানছ চিচিপাছক পৰাস্ত কৰে। ছাৰ্বিয়ান খেলুৱৈগৰাকীয়ে ৬-৩, ৭-৬ (৭-৪), ৭-৬ (৭-৫) ব্যৱধানত জয়লাভ কৰি গ্ৰীচৰ চিচিপাছক পৰাস্ত কৰে।
ইয়াৰ জৰিয়তে দশম অষ্ট্ৰেলিয়ান অ’পেনত জয়লাভ কৰে ন’ভাক জ’কভিচে। ফলস্বৰূপে স্পৰ্শ কৰে ৰাফেল নাডালৰ ২২ টা গ্ৰেণ্ড শ্লেম বিজয়ৰ অভিলেখ। একে সময়তে কাৰ্লোছ আলকাৰাজক আঁতৰাই পুনৰ টেনিছ ৰেংকিঙত শীৰ্ষস্থান দখল কৰে জ’কভিচে।
উল্লেখ্য যে অষ্ট্ৰেলিয়ান অ’পেনত এইবাৰ জ’কভিচে দূৰ্দান্ত প্ৰদৰ্শন আগবঢ়াইছে। ইটোৰ পাছত সিটো ৰাউণ্ডৰ মেচত প্ৰতিপক্ষক ধৰাসায়ী কৰি আহিছিল ছাৰ্বিয়ান তাৰকাগৰাকীয়ে।
জ’কভিচৰ এই বিজয়ৰ ধাৰা ফাইনেলত গ্ৰীচৰ চিচিপাছে শেষ কৰিব বুলি বহুতে ধাৰণা কৰিছে। বিশেষকৈ যোৱা কেইদিনমানৰ পৰা গ্ৰীক খেলুৱৈজনো তীব্ৰ ফৰ্মত আছে। কিন্তু ফাইনেলত চিচিপাছৰ ছন্দ দেখা পোৱা নগ’ল। জ’কভিচে মেচখনত আগ্ৰাসী ৰূপ লয়।
Continue Reading
