অচিৰেই ভাৰতে অতিক্ৰম কৰিব চীনক! ৰাষ্ট্ৰসংঘৰ জনসংখ্যা বিষয়ক প্ৰতিবেদনত গুৰুত্বপূৰ্ণ তথ্য

ডিজিটেল ডেস্কঃ ২০২৩ চনৰ ভিতৰত ভাৰতে চীনক অতিক্ৰম কৰিব। চীনৰ জনসংখ্যাতকৈ অধিক হ’ব ভাৰতৰ জনসংখ্যা। তদুপৰি নৱেম্বৰৰ ১৫ তাৰিখৰ ভিতৰত বিশ্বৰ জনসংখ্যা আঠ বিলিয়নত ভৰি থব। ৰাষ্ট্ৰসংঘৰ ৱৰ্ল্ড পপুলেচন প্ৰচপেক্টছ ২০২২ৰ এক প্ৰতিবেদনত এই ভৱিষ্যৎ বাণী কৰা হৈছে।

ভাৰতৰ উপৰিও ২০৫০ চনৰ ভিতৰত নাইজেৰিয়া, ইথিঅ’পিয়া আৰু ফিলিপাইনছকে ধৰি আঠখন দেশত ব্যাপক হাৰত জনসংখ্যা বৃদ্ধি পাব।

জনসংখ্যা বৃদ্ধিৰ লগে লগে বিশ্বত ব্যাপক হাৰত জলবায়ু আৰু খাদ্য সংকট, অৰ্থনৈতিক অসমতা, প্ৰব্ৰজনৰ দৰে সংকটে তীব্ৰ ৰূপ ধাৰণ কৰিব। কিন্তু ৰাষ্ট্ৰসংঘৰ এগৰাকী বিষয়া ডঃ নাটালিয়া কানেমে বিষয়টো লৈ শংকিত হ’বলৈ বাৰণ কৰিছে।

ইয়াৰ পৰিৱৰ্তে তেওঁ দেশসমূহক দাৰিদ্ৰপীড়িত সামাজিক বৰ্গসমূহক সহযোগ কৰিবলৈ আহ্বান জনাইছে। তেওঁ কয় যে জনসংখ্যা বৃদ্ধি ভয়ৰ কাৰণ হ’ব নোৱাৰে। কেৱল কিছু ব্যৱস্থাৰ মাজেৰে এইসমূহ মোকাবিলা কৰিব লাগিব।

আনহাতে জন্ম নিয়ন্ত্ৰণৰ বিষয়টো উত্থাপন কৰি তেওঁ কয় যে ইয়াৰ স’তে সংযুক্ত থকা মানৱ অধিকাৰ উলংঘনক কেতিয়াও মানি ল’ব নোৱাৰি। বিশেষকৈ মহিলাৰ ক্ষেত্ৰত কেতিয়া গৰ্ভধাৰণ কৰিব আৰু কেতিয়া গৰ্ভপাত কৰিব, সেই বিষয়টোক লৈ তেওঁ আলোকপাত কৰে।