১৫ বছৰৰ ভিতৰত ভাৰতত ৪৫০ মিলিয়ন লোক মুক্ত হৈছে দৰিদ্ৰতাৰ পৰা! ৰাষ্ট্ৰসংঘৰ প্ৰতিবেদনত গুৰুত্বপূৰ্ণ তথ্য

ডিজিটেল ডেস্কঃ ভাৰতত দৰিদ্ৰতাৰ পৰা মুক্তিলাভ কৰিছে এক বুজনসংখ্যক লোকে। ২০০৫-০৬ বৰ্ষৰ পৰা ২০১৯-২১ বৰ্ষলৈকে প্ৰায় ৪১৫ মিলিয়ন লোকে দৰিদ্ৰতাৰ পৰা মুক্ত হৈছে। এই তথ্য পোৱা গৈছে ইউনাইটেড নেচনছ ডেভলপমেণ্ট প্ৰগ্ৰেম আৰু অক্সফ’ৰ্ড পভাৰ্টি এণ্ড হিউমেন ডেভলপমেণ্ট ইনিচিয়েটিভৰ দ্বাৰা সোমবাৰে প্ৰকাশিত গ্ল’বেল মাল্টিডাইমেনচনেল প’ভাৰ্টি ইনডেক্স ২০২২ত।

দৰিদ্ৰতাৰ পৰা সকাহ পোৱাৰ ক্ষেত্ৰত সফলতা লাভ কৰিলেও ভাৰততে বিশ্বৰ ভিতৰতে সৰ্বাধিক সংখ্যক দাৰিদ্ৰ্যপীড়িত লোকে বাস কৰে। ২০২০ চনত ইয়াৰ পৰিমাণ হৈছে ২২৮.৯ মিলিয়ন লোক।

আনহাতে, ২০০৫-০৬ৰ পৰা ২০১৯-২১ বৰ্ষলৈকে দৰিদ্ৰতাৰ গ্ৰাসত পৰা ভাৰতীয় লোকৰ সংখ্যা হৈছে ৫৫ৰ পৰা ১৬ শতাংশ। অৱশ্যে এই তথ্যসমূহত মহামাৰীৰ পাছৰ পৰিস্থিতিৰ বিষয়ে একো সন্নিৱিষ্ট কৰা নাই। তৎসত্বেও মহামাৰীয়ে দৰিদ্ৰতা, খাদ্য সংকটৰ সৃষ্টি কৰিছে বুলি তাত কোৱা হৈছে।

কোৱা হৈছে ভাৰতৰ জনসংখ্যাই ক’ভিড মহামাৰী, খাদ্য আৰু ইন্ধনৰ মূল্যবৃদ্ধিৰ দৰে দুঃসহ পৰিস্থিতিৰ সন্মুখিন হৈছে। এই সম্পৰ্কত উপযুক্ত ব্যৱস্থা ল’বলৈও তাত কোৱা হৈছে।

উল্লেখ্য যে দা গ্ল’বেল মাল্টিডাইমেনটনেল প’ভাৰ্টি ইনডেক্সৰ প্ৰতিবেদনক বিশ্বৰ এটা গুৰুত্বপূৰ্ণ প্ৰতিবেদন হিচাপে ধৰা হয়। ২০১০ চনৰ পৰা প্ৰকাশ পাই অহা এই প্ৰতিবেদনত বিশ্বৰ ১০০ খনতকৈও অধিক উন্নয়নশীল দেশৰ ওপৰত তথ্য প্ৰকাশ কৰি আহিছে।