ওড়িশা চৰকাৰৰ ডাঙৰ সিদ্ধান্ত! এতিয়াৰে পৰা মহিলাক নিশা কাম কৰিবলৈ বাধ্য কৰাব নোৱাৰিব কোনো কোম্পানীয়ে

ডিজিটেল ডেস্কঃ বহু প্ৰতিষ্ঠানত নিশা মহিলাই কাম কৰিব লগীয়া হয়। তাৰবাবে মহিলাৰ জীৱনলৈ কেতিয়াবা বিপদো নামি আহে। এই বিষয়ত ওড়িশা চৰকাৰে লৈছে ডাঙৰ সিদ্ধান্ত। এতিয়াৰে পৰা মহিলাক নিশা কাম কৰিবলৈ বাধ্য কৰাব নোৱাৰিব কোনো প্ৰতিষ্ঠানে বা কোনো কোম্পানীয়ে। মহিলাসকলৰ সুৰক্ষাৰ বাবে এই সিদ্ধান্ত গ্ৰহণ কৰিছে ওড়িশা চৰকাৰে। সিদ্ধান্ত অনুসৰি, কোনো মহিলাক নিশা কাম কৰিবৰ বাবে বাধ্য কৰাব নোৱাৰিব কোনো কোম্পানীয়ে। 

মহিলাৰ সুৰক্ষাৰ লগত জড়িত বিষয়ৰ ওপৰত অধিসূচনা জাৰি কৰি ওড়িশা চৰকাৰে কৈছে যে মহিলা কৰ্মচাৰীক নিশা কাম কৰাৰ বাবে কোনো মালিক পক্ষই বাধ্য কৰাব নোৱাৰিব। 

অধিসূচনা অনুসৰি কোনো মহিলা কৰ্মচাৰীক নিশা কাম কৰাৰ বাবে জোৰ কৰিব নোৱাৰিব। যদি কোনো মহিলাই নিজ ইচ্ছা অনুসৰি নিশা কাম কৰিব বিচাৰে তেন্তে ইয়াৰ বাবে কোম্পানীসমূহে মহিলাসকলৰ পৰা লিখিতভাৱে ল’ব লাগিব। কোনো মহিলাই নিশাৰ ভাগত অকলে কাম কৰিব নোৱাৰিব, কমেও ৩ গৰাকী মহিলা থাকিব লাগিব। মহিলাসকলৰ জীৱনৰ নিৰাপত্তা নিশ্চিত কৰিবলৈ কোম্পানীসমূহে পিক-আপ আৰু ড্ৰপৰ সুবিধা প্ৰদান কৰাটো বাধ্যতামূলক। 

লগতে কয় যে, মহিলাক অনা-নিয়া কৰা বাহনত জিপিএছ ট্ৰেকিং সজ্জিত হ’ব লাগিব আৰু ঘৰৰ ওচৰত নমাই দিব লাগিব। ইয়াৰোপৰি গাড়ীৰ চালকৰ বায়’ডাটা আৰু আৰক্ষীৰ পৰীক্ষণ বাধ্যতামূলক হ’ব। অহা যোৱাৰ ক্ষেত্ৰত মহিলাৰ সুৰক্ষাৰ প্ৰদানৰ বাবে এই সিদ্ধান্ত গ্ৰহণ কৰিছে চৰকাৰে।

ইয়াৰ লগতে মহিলা কৰ্মচাৰীৰ স্বাস্থ্যকো অগ্ৰাধিকাৰ দিছে চৰকাৰখনে। কোম্পানীসমূহে পৰিষ্কাৰ শৌচাগাৰ আৰু খোৱাপানীৰ ব্যৱস্থা কৰিব লাগিব। দিন আৰু ৰাতিৰ ডিউটিৰ মাজত কমেও ৮ ঘন্টা জিৰণি লোৱাৰ সময় থাকিব লাগিব। প্ৰতিষ্ঠানৰ লগতে পথসমূহতো চিচিটিভি থাকিব লাগিব যাতে মহিলাসকলৰ সুৰক্ষা নিশ্চিত হয়।

উল্লেখ্য যে কোম্পানীসমূহে “যৌন নিৰ্যাতনৰ পৰা মহিলাক সুৰক্ষা আইন, ২০১৩”ৰ বিধানসমূহ পালন কৰাটো বাধ্যতামূলক বুলি উল্লেখ কৰিছে চৰকাৰে।

উল্লেখিত নিয়মসমূহ ভংগ কৰিলে কৰ্তৃপক্ষ শাস্তিৰ সন্মুখীন হ'ব বুলি ঘোষণা।

ওড়িশা চৰকাৰৰ এই সিদ্ধান্তক সকলোৱে একমুখে প্ৰশংসা কৰিছে।