ডিজিটেল ডেস্কঃ আশাহত কৰিলে টীম ইণ্ডিয়াই৷ বিশ্ব টেষ্ট চেম্পিয়নশ্বিপৰ ফাইনেলৰ প্ৰথম ইনিংছত তাচপাতৰ তুৰুপৰ দৰে খহি পৰে টীম ইণ্ডিয়াৰ বেটিং লাইনআপ৷ অষ্ট্ৰেলিয়াৰ বেগী বলাৰসকলৰ বিৰুদ্ধে ব্যৰ্থ হয় ৰোহিত শৰ্মা- বিৰাট কোহলী৷
প্ৰথম ইনিংছত অষ্ট্ৰেলিয়াই সংগ্ৰহ কৰা ৪৬৯ ৰাণৰ প্ৰত্যুত্তৰত ভাৰতে ইনিংছ আৰম্ভ কৰিবলৈ আহিয়েই উজুটি খায়৷ ৫ অভাৰৰ পাছতে পেট কামিন্সৰ বলত এলবিডব্লিউ হৈ পেভিলিয়নমুখী হয় অধিনায়ক ৰোহিত শ্ৰমা৷ তেওঁ কৰে মাত্ৰ ১৫ ৰাণ৷ তাৰ পাছৰ অভাৰটোত স্কট বলেণ্ডে শুভমান গীলৰ খুটি তচনচ কৰে৷ ‘ক্ৰিকেটৰ ৰাজপুত্ৰ’ হিচাপে আখ্যা পোৱা গীলে কৰে মাত্ৰ ১৩ ৰাণ৷
অপেনাৰদ্বয় ব্যৰ্থ হোৱাৰ পাছতে আহে টেষ্ট ক্ৰিকেটৰ বিশেষজ্ঞ চেতেশ্বৰ পুজাৰা৷ পূজাৰাক কেমেৰণ গ্ৰীনে ১৪ ৰাণ কৰি থকা অৱস্থাত পেভিলিয়নৰ বাট দেখুৱায়৷ আশাহত কৰে বিৰাট কোহলীয়েও৷ মিচেল ষ্টাৰ্কৰ চিকাৰ হয় কোহলী (১৪)৷
দলৰ মিডল অৰ্ডাৰত এইদৰে অষ্ট্ৰেলিয়াৰ বেগী বলাৰসকলে পৰাক্ৰম দেখুৱাৰ পিছত ইনিংছ চম্ভালিবলৈ চেষ্টা কৰে আজিংক্য ৰাহানে আৰু ৰবীন্দ্ৰ জাডেজাই৷ জাডেজাই ৫১ টা বলত ৪৮ ৰাণ কৰি আউট হলেও বাতৰি লিখাৰ পৰলৈকে শ্ৰীকৰ ভাৰতৰ স’তে ৰাহানেই ক্ৰিজত বৰ্তী আছে৷ বৰ্তমানলৈকে ৰাহানেই ৭১ বলত ২৯ ৰাণ কৰি আছে৷
বাতৰি লিখাৰ পৰলৈকে ভাৰতে ৩৭ অভাৰত পাঁচটা উইকেট হেৰুৱায় সংগ্ৰহ কৰিছে ১৪৭ ৰাণ৷ অষ্ট্ৰেলিয়াৰ আটাইকেওজন বলাৰেই এটাকৈ উইকেট লাভ কৰিছে৷
ইয়াৰ পূৰ্বে প্ৰথম ইনিংছত অষ্ট্ৰেলিয়াই আটাইকেওটা উইকেট হেৰুৱাই সংগ্ৰহ কৰে ৪৬৯ ৰাণ৷ দলটোৰ এই দূৰ্দান্ত স্থিতিৰ মূলতে হৈছে ষ্টিভ স্মিথ আৰু ট্ৰেভিছ হেডৰ দূৰ্দান্ত শতক৷ স্মিথে ২৬৮ টা বলৰ সন্মুখিন হৈ ১২১ ৰাণ কৰাৰ বিপৰীতে হেডে কৰে ১৭৪ টা বলত ১৬৩ ৰাণ৷ উইকেটকীপাৰ এলেক্স কেৰীয়েও ৪৮ ৰাণৰ বৰঙণি আগবঢ়ায়৷
ভাৰতৰ হৈ দূৰ্দান্ত বলিং কৰি মহম্মদ চিৰাজে লাভ কৰে চাৰিটা উইকেট৷ শ্বাৰদুল ঠাকুৰে লাভ কৰে দুটা উইকেট৷
Continue Reading
