অমিক্ৰন ভীতিয়ে খেদি ফুৰিছে আমেৰিকাক, তীব্ৰ গতিত বৃদ্ধি পাইছে কৰ’না সংক্ৰমিতৰ হাৰ...

ৱাশ্বিংটনঃ কৰ’না মহামাৰীয়ে সৰ্বত্ৰে সংহাৰী ৰূপ ধাৰণ কৰা দেখিবলৈ পোৱা গৈছে। বিশ্বৰ আগশাৰীৰ দেশসমূহেও কৰ’না মহামাৰীৰ সংক্ৰমণৰ পৰা হাত সাৰিব পৰা নাই। আমেৰিকা যুক্তৰাষ্ট্ৰতো ভয়াৱহ হাৰত বৃদ্ধি পাইছে কৰ’না মহামাৰীৰ নতুন ষ্ট্ৰেইন অ’মিক্ৰন সংক্ৰমিতৰ সংখ্যা। বিগত ২৪ ঘণ্টাত আমেৰিকা যুক্তৰাষ্ট্ৰত ১০ লাখৰো অধিক ক’ভিড ৰোগী চিনাক্ত কৰা হৈছে বুলি জানিবলৈ পোৱা গৈছে। উল্লেখ্য যে, সোমবাৰে দেশখনত ১০,৮৩,৬৪৮ গৰাকী কৰ’নাক্ৰান্তক চিনাক্ত কৰা হৈছে।

ইয়াৰ ৪দিন পূৰ্বে আমেৰিকা যুক্তৰাষ্ট্ৰত ৫৯০,০০০ জন ৰোগী চিনাক্ত কৰা হৈছিল। ক্ৰমাত্‍ ভয়াৱহ অৱস্থাৰ দিশে গতি কৰিছে দেশখনে। পূৰ্বৰ ডেলটা ভেৰিয়েণ্টৰ তুলনাত আমেৰিকাত সম্প্ৰতি অমিক্ৰনে তীব্ৰতৰ ৰূপ ধাৰণ কৰা ঘটনাই চিন্তিত কৰি তুলিছে সকলোকে। কৰ’নাক্ৰান্ত ৰোগীৰ বৰ্ধিত সংখ্যাই বিপাঙত পেলাইছে কৰ্তৃপক্ষক। স্মৰ্তব্য যে, ডেল্টা ভেৰিয়েণ্টৰ বিস্তাৰৰ মাজতে বিগত বৰ্ষৰ ৭ মে'ত ভাৰতত এদিনতে ৪,১৪,০০০ ৰোগী চিনাক্ত কৰা হৈছিল। সেয়া আছিল অভিলেখ। এতিয়া আমেৰিকাই সকলোকে অতিক্ৰম কৰি এটা দিনৰ ভিতৰতে সৰ্বাধিক আক্ৰান্তৰ তালিকালৈ উন্নীত হৈছে।