মাজ সমুদ্ৰত মৃত্যুৰ কিৰিলি, এটা বছৰত ৪ সহস্ৰাধিক শৰণাৰ্থীৰ মৃত্যু...

নতুন দিল্লীঃ মাজ সমুদ্ৰত মৃত্যুৰ কিৰিলি! সহস্ৰাধিক শৰণাৰ্থীৰ মৃত্যুৱে উদ্বিগ্ন কৰি তুলিছে সকলোকে। জীৱনৰ বিপদাশংকাত সাগৰ পাৰ হৈ স্পেইনলৈ যোৱাৰ পথতে ৪,৫০০ প্ৰব্ৰজনকাৰী মৃত্যুৰ মুখত পৰিছে। ২০২১চনত এনেদৰে মৃত্যু হোৱা প্ৰব্ৰজনকাৰীৰ মৃত্যুৰ পৰিসংখ্যাই সম্প্ৰতি সকলোৰে চকু কপালত তুলিছে। মৃত লোকসকলৰ ভিতৰত আছে অসংখ্য শিশু। শৰণাৰ্থীসকলৰ অধিকাৰ সুৰক্ষিত কৰাৰ লক্ষ্যৰে দীৰ্ঘদিন কাম কৰি অহা স্পেনিছ ৱাকিং ব’ৰ্ডাৰ নামৰ সংস্থা এটাই প্ৰকাশ কৰা শেহতীয়া প্ৰতিবেদনত এই তথ্য পোহৰলৈ আহিছে।

ৱাকিং ব’ৰ্ডাৰৰ মতে, ‘২০২১ চনত সাগৰ পাৰ হৈ স্পেইনলৈ বিপদজনকভাৱে যাত্ৰা কৰা সময়ত ৪,৪০০ তকৈও অধিক প্ৰব্ৰজনকাৰী সাগৰত মৃত্যুবৰণ কৰিছে।’ জানিবলৈ পোৱা মতে, স্পেনিছ সংস্থাটোৱে ২০১৮ চনতে সাগৰত মৃত্যু হোৱা প্ৰব্ৰজনকাৰী শৰনাৰ্থীৰ তথ্য নথিভুক্ত কৰা আৰম্ভ কৰিছিল ।বিগত বৰ্ষসমূহতকৈ ২০২১ চনত সাগৰত এনেদৰে বিপুল সংখ্যক লোকৰ মৃত্যু হোৱা বুলিও সদৰী কৰিছে স্পেনিছ সংস্থাটোৱে।