ডিজিটেল ডেস্কঃ অন্ধ বিশ্বাসৰ বশৱৰ্তী হৈ বহুতেই বহু কাম কৰি পেলায়। এইবাৰ অন্ধ বিশ্বাসৰ ভয়ংকৰ পৰিণতি দেখা গ’ল গুজৰাটত। গুজৰাটৰ ৰাজকোট জিলাত এহাল দম্পতীয়ে ‘গিলোটিন’ সদৃশ যন্ত্ৰে নিজৰ মূৰ কাটি আত্মবলিদান দিয়ে ।
তেওঁলোকে কি কাৰণত এনেদৰে আত্ম বলিদান দিলে সেয়া এতিয়াও স্পষ্ট হোৱা নাই। আৰক্ষীয়ে প্ৰকাশ কৰা মতে দম্পতীহালে দীৰ্ঘদিন ধৰি এটা সৰু ঘৰত থাকি পূজা-পাঠ কৰি গৈছিল। বহুতে ধাৰণা কৰা অনুসৰি ভগৱানক সন্তুষ্ট কৰাৰ বাবেই তেওঁলোকে আত্ম বলিদান দিব পাৰে।
আৰক্ষীয়ে প্ৰকাশ কৰা মতে আত্ম বলিদান দিয়াৰ বাবেই দম্পতীহালে ‘গিলোটিন’ৰ দৰে যন্ত্ৰটো নিৰ্মাণ কৰি উলিয়াইছিল। আৰক্ষীয়ে দিয়া তথ্য অনুসৰি দম্পতী হালে ভিঞ্চিয়া গাঁৱৰ এটা ঘৰত বাস কৰিছিল আৰু তাতেই তেওঁলোকে এনেদৰে আত্মহত্যা কৰে।
আৰক্ষীয়ে এখন ছুইচাইড নোটো উদ্ধাৰ কৰিছে। তাত তেওঁলোকে নিজৰ দুই সন্তান আৰু পিতৃ-মাতৃৰ যত্ন ল’বলৈ অনুৰোধ কৰি গৈছে। আৰক্ষীয়ে মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। আৰক্ষীয়ে লগতে প্ৰকাশ কৰা মতে দম্পতীহালে যন্ত্ৰটোৰ তলতে এটা গাঁত খান্দি লৈছিল। যন্ত্ৰটোৱে মূৰ কাটি পেলোৱাৰ পিছতে মূৰ দুটা সেই গাঁতত পৰিছিল। এই ঘটনাই সমগ্ৰ এলেকাটোতে আলোড়ণৰ সৃষ্টি কৰিছে।
Continue Reading
