ডিজিটেল ডেস্কঃ বিয়াৰ পৰা উভতি অহাৰ সময়তে এখন বাছ দ’ খাৱৈত পৰি যোৱাৰ ফলত এটি শিশুসহ সাতজন লোক নিহত হৈছে। ঘটনাটোত কমেও ২৯ জন লোক আহত হৈছে। ঘটনাটো সোমবাৰে মাজনিশা অন্ধ্ৰ প্ৰদেশৰ প্ৰকাশম জিলাৰ দৰ্চীত সংঘটিত হৈছে।
আৰক্ষীয়ে জনোৱা অনুসৰি সোমবাৰে পুৱা প্ৰায় ১২.৩০ বজাত বিবাহ যাত্ৰীক কঢ়িয়াই নিয়া বাছখনে পোডিলিৰ পৰা কাকিনাদালৈ উভতি আহি আছিল। প্ৰত্যক্ষদৰ্শীয়ে প্ৰকাশ কৰা মতে বাছখনে দৰ্চীৰ ওচৰৰ বিপৰীত দিশৰ পৰা অহা এখন গাড়ীক বাট এৰি দিবলৈ যোৱাৰ সময়তে ৰাস্তাৰ কাষৰ গাৰ্ডৱালত খুন্দা মাৰে। গতি বেছি হোৱাৰ বাবে চালকজনে বাছখনৰ নিয়ন্ত্ৰণ হেৰুৱাই পেলায় আৰু বাছখনে পথৰ কাষৰ নাগাৰ্জুন সাগৰ খালত পৰি যায়। ।
বাছখনত মুঠ ৪৭ গৰাকী যাত্ৰী আছিল। তেওঁলোকৰ সাতজনৰ মৃত্যু হৈছে। যাৰ ভিতৰত এটা শিশুও আছে। উদ্ধাৰকাৰী দল আৰু আৰক্ষী ঘটনাস্থলীত উপস্থিত হৈ যাত্ৰীসকলক উদ্ধাৰ কৰিবলৈ সক্ষম হয়। আহতসকলক চিকিৎসালয়ত ভৰ্তি কৰোৱা হৈছে।
দৰ্চীৰ উপ-পৰিদৰ্শক ৰামকৃষ্ণই কয়, "দুৰ্ঘটনাটোত সাতজন লোকৰ মৃত্যু হৈছে। কেইবাজনো লোক আহত হৈছে। তেওঁলোকৰ ১৫ জন গুৰুতৰ ভাৱে আঘাতপ্ৰাপ্ত হৈছে। আহতসকলক দৰ্চি আৰু অংগোলৰ চিকিৎসালয়ত ভৰ্তি কৰোৱা হৈছে।’’
Continue Reading
