ডিজিটেল ডেস্ক: দেশজুৰি চৰ্চা লাভ কৰিছে মুকেশ আম্বানী আৰু নীতা আম্বানীৰ কনিষ্ঠ পুত্ৰ অনন্ত আম্বানী আৰু ৰাধিকা মাৰ্চেণ্টৰ প্ৰি–ৱেডিং কাৰ্যসূচী। ১ মাৰ্চৰ পৰা তিনিদিনীয়াকৈ আয়োজন কৰা হৈছে বিশাল কাৰ্যসূচীৰ।
প্ৰি–ৱেডিঙৰ পূৰ্বে জামনগৰৰ জোগবড় গাঁৱত ৫১ হাজাৰ লোকক অন্ন সেৱা কৰে আম্বানী পৰিয়ালে। বিবাহৰ পূৰ্বে গাঁওবাসীৰ আশীৰ্বাদ বিচাৰি অন্নসেৱা অনন্ত আম্বানী আৰু ৰাধিকাৰ পৰিয়ালৰ। পৰাম্পৰাগত গুজৰাটী খাদ্যৰে আপ্যায়ণ কৰা হয় গাঁওবাসীক।
অনন্ত–ৰাধিকাৰ তিনিদিনীয়া প্ৰি–ৱেডিং অনুষ্ঠানত দেশ–বিদেশ সহস্ৰাধিক অতিথিয়ে অংশগ্ৰহণ কৰিব। হাইপ্ৰফাইল অতিথিসকলৰ তালিকাত আছে ফেচবুকৰ CEO মাৰ্ক জুকাৰবাৰ্গ, মাইক্ৰ’ছফ্টৰ প্ৰতিষ্ঠাপক বিল গেট্ছ, গুগলৰ CEO সুন্দৰ পিছাই, উদ্যোগপতি গৌতম আদানী, সুনীল মিট্টাল, ক্ৰিকেটাৰ শচীন তেণ্ডুলকাৰ, বলীউডৰ মেগা ষ্টাৰ অমিতাভ বচ্চন, শ্বাহৰু খান আদি। বিভিন্ন দেশৰ ২৫০০ বিধ খাদ্যৰে অতিথিক আপ্যায়নৰ ব্যৱস্থা কৰা হৈছে। ব্ৰেক ফ্ৰাষ্টত থাকিব ৭০ বিধ সামগ্ৰী। দুপৰীয়া আৰু নিশাৰ আহাৰত ২৫০তকৈও অধিক খাদ্যৰ লগতে নিশা ১২ বজাৰ পৰা পুৱা ৪ বজালৈ ৮৫ বিধ স্নেক্ছৰ ব্যৱস্থা।
অনন্ত–ৰাধিকাৰ প্ৰি–ৱেডিঙত অংশ লোৱাৰ উদ্দেশ্যে ইতিমধ্যে জামনগৰত উপস্থিত হৈছে বলীউডৰ বহু তাৰকাৰ লগতে হলীউডৰ পপষ্টাৰ ৰিহানা। প্ৰধানমন্ত্ৰী মোদীৰ ৱেড–ইন–ইণ্ডিয়া আহ্বানক সঁহাৰি জনাই আইতাকৰ জন্মভূমি আৰু পিতৃৰ কৰ্মভূমি জামনগৰক প্ৰাধান্য দিছে আম্বানী পৰিয়ালে। উল্লেখযোগ্য যে, ১২ জুলাইত সম্পন্ন হ’ব অনন্ত–ৰাধিকাৰ বহু প্ৰতিক্ষিত বিবাহ অনুষ্ঠান।
Continue Reading
