ডিজিটেল ডেস্কঃ পৰ্ণছবি চোৱাৰ ক্ষেত্ৰত বিশ্বৰ ভিতৰতে ভাৰতৰ স্থান প্ৰথমতে আছে। এনে সময়তে আজি চিবিআইয়ে ইণ্টাৰনেটত শিশু পৰ্ণগ্ৰাফীৰ প্ৰচলন ৰোধ কৰিবলৈ এটা গুৰুত্বপূৰ্ণ পদক্ষেপ গ্ৰহণ কৰে।
শনিবাৰে দেশৰ ২০ খন ৰাজ্য আৰু কেন্দ্ৰীয় শাসিত অঞ্চলৰ ৫৬ টা স্থানত চিবিআইয়ে তালাচী চলায়। চিবিআইৰ এক সূত্ৰই এই কথা প্ৰকাশ কৰিছে। শিশু পৰ্ণছবিৰ বিৰুদ্ধে চিবিআইয়ে চলোৱা এই অপাৰেচনৰ নাম দিয়া হৈছে 'অপাৰেচন মেঘ-চক্ৰ'। জানিব পৰা মতে শনিবাৰে চলোৱা এই অভিযান অনলাইন শিশু পৰ্ণগ্ৰাফী বিয়পোৱাৰ বিৰুদ্ধে দাখিল কৰা কেইবাটাও অভিযোগৰ ওপৰত আধাৰত কৰা হৈছে।
যোৱা কেইসপ্তাহমানৰ পৰা চিবিআইৰ অনুসন্ধানকাৰীসকলে চাইবাৰ নিৰীক্ষণ চলাই আছে আৰু একাধিক মোবাইল নম্বৰত শিশু পৰ্ণগ্ৰাফী ডাউনলোড আৰু সেইবোৰ শ্বেয়াৰ কৰাৰ বিষয়ে তথ্য সংগ্ৰহ কৰিছে। শিশু পৰ্ণগ্ৰাফী লেনদেন সম্পৰ্কীয় তথ্য বিভিন্ন কম্পিউটাৰত উপলব্ধ হোৱাৰ কথাও চিবিআইয়ে প্ৰকাশ কৰিছে। তদুপৰি এটা চক্ৰই ক্লাউডত শিশু পৰ্ণ ছবি সংৰক্ষণ কৰি সেইবোৰ বিয়পাই থকাৰ তথ্যও চিবিআইয়ে লাভ কৰিছে।
এনে তথ্যৰ ওপৰত ভিত্তি কৰি আজিৰ অভিযান চলোৱা হয়। ২০১৯ চনত ইণ্টাৰনেটত শিশু পৰ্ণগ্ৰাফীৰ বৰ্ধিত প্ৰৱণতা নিয়ন্ত্ৰণ কৰিবলৈ চিবিআইৰ এটা বিশেষ কোষ স্থাপন কৰা হৈছিল। শিশুক যৌন উৎপীড়ন আৰু যৌন শোষণৰ বিৰুদ্ধে থকা চেলটোক ইণ্টাৰনেটত নিৰীক্ষণৰ জৰিয়তে শিশু পৰ্ণগ্ৰাফীৰ বিস্তাৰ চিনাক্ত কৰা আৰু পকচো তথা তথ্য প্ৰযুক্তি আইনৰ অধীনত অভিযুক্তৰ বিৰুদ্ধে প্ৰয়োজনীয় ব্যৱস্থা গ্ৰহণৰ ব্যৱস্থা কৰা হৈছে।
কিন্তু নিৰন্তৰ নিৰীক্ষণত ৰখা স্বত্বেও শিশু পৰ্ণগ্ৰাফী চক্ৰটোক সম্পূৰ্ণৰূপে নিষ্ক্ৰিয় কৰা সম্ভৱ হোৱা নাই। উল্লেখ্য কেইমাহমান আগতে, ৰাষ্ট্ৰীয় শিশু অধিকাৰ সুৰক্ষা আয়োগে (এনচিপিচিআৰ) ইণ্টাৰনেটত শিশু পৰ্ণগ্ৰাফীৰ প্ৰচলনক লৈ উদ্বেগ প্ৰকাশ কৰিছিল।
Continue Reading
