'অপাৰেশ্যন সিন্দূৰ' শেষ হোৱা নাই, সন্ত্রাসবাদীক সমর্থন দি থাকিলে পৰিণাম বিষম হ'ব: ৰাজনাথ সিং

ডিজিটেল ডেস্কঃ দেশৰ প্ৰতিৰক্ষা মন্ত্ৰী ৰাজনাথ সিঙে কয় যে 'অপাৰেশ্যন সিন্দূৰ'ৰ এতিয়াও অন্ত পৰা নাই। পাকিস্তানক পুনৰ সতর্কবাণী দি প্ৰতিৰক্ষা মন্ত্ৰীজনে কয় যে ভাৰতৰ ভূমিত ভৱিষ্যতে যিকোনো সন্ত্রাসবাদীৰ আক্ৰমণৰ বাবে পাকিস্তানে পৰিণাম ভুগিব লাগিব।

সন্ত্রাসবাদৰ বিৰুদ্ধে যিকোনো ব্যৱস্থা ল'বলৈ ভাৰত প্ৰস্তুত বুলি ৰাজনাথ সিঙে মন্তব্য কৰে। আন্তঃৰাষ্ট্ৰীয় যোগ দিৱস উপলক্ষে ভাৰতীয় সেনাৰ উধমপুৰস্থিত নর্ডার্ন কমাণ্ডত আয়োজিত অনুষ্ঠানত ভাষণ দি প্ৰতিৰক্ষা মন্ত্ৰীজনে এই মন্তব্য কৰে।

কেন্দ্ৰীয় মন্ত্রী সিঙে কয় যে ভাৰতৰ বিৰুদ্ধে চলোৱা পাকিস্তানৰ অশুভ নীতিক 'অপাৰেশ্যন সিন্দূৰ'ৰ জৰিয়তে বিফল কৰা হ'ল। 'অপাৰেশ্যন সিন্দূৰ'ৰ অন্ত পৰা নাই। আমি পাকিস্তানক সকীয়াই দিব বিচাৰিছোঁ যে যদি পাকিস্তানে সন্ত্রাসবাদীক সমর্থন কৰাটো বাহাল ৰাখে, তেনেহ'লে দেশখনে ইয়াৰ পৰিণাম ভুগিব লাগিব, প্ৰতিৰক্ষা মন্ত্ৰী ৰাজনাথ সিঙে এইদৰে পাকিস্তানক হুংকাৰ দিয়ে।

উৎসঃ দৈনিক জনমভূমি