ডিজিটেল ডেস্কঃ আৰম্ভ হ’ল ফুটবলৰ মহাৰণ। এতিয়া এমাহজোৰা উৎকণ্ঠাৰে পাৰ কৰিব বিশ্বৰ অগণন ফুটবলপ্ৰেমীয়ে। জাকজমক অনুষ্ঠানেৰে কাটাৰৰ ৰাজধানী দোহাৰ আল বায়াত ষ্টেডিয়ামৰ ফিফা বিশ্বকাপৰ শুভাৰম্ভণী কৰা হয়।
ঐক্য- সাম্যৰ বাৰ্তাৰে উদ্বোধনী অনুষ্ঠানটো সজাই তোলা হ। ফুটবলে পৃথিৱীখনক এক কৰাৰ বাৰ্তা দিয়া হ’ল আৰৱৰ পৰা।
নিৰ্ধাৰিত সময়মতেই কাটাৰৰ শাসক শ্বেখ মহম্মদ বিন ৰছিদ আল-মাখতুমে ষ্টেডিয়ামত ভৰি থয়। তাৰপাছতে আৰম্ভ হয় সংগীতানুষ্ঠান।
সংগীত পৰিৱেশন কৰে প্ৰখ্যাত কোৰিয়ান বেণ্ড বিটিএছৰ মূল শিল্পী জান কুকে। তাৰপাছতে কাটাৰৰ জনপ্ৰিয় গায়ক ফাহাদ-আল-কুৱায়চিয়ে সংগীত পৰিৱেশন কৰে।
পূৰ্বৰ বিশ্বকাপৰ গানসমূহো অনুষ্ঠানটোত বাজি উঠে। ১৯৯৮ চনৰ ৰিকী মাৰ্টিনৰ 'ওলে ওলে’ৰ পৰা ২০১০ চনৰ শ্বাকিৰাৰ 'ৱাকা ৱাকা’ৰ তালত নাচি উঠে সকলো।
সংগীতানুষ্ঠানৰ পাছতে হলিউডৰ অভিনেতা মৰ্গান ফ্ৰীমেনে ষ্টেডিয়ামত উপস্থিত হৈ ফুটবলৰ মহত্ব প্ৰকাশ কৰে। অভিনেতাজনে ফুটবলক ঐক্য-শান্তিৰ প্ৰতীক হিচাপে আখ্যা দিয়ে। তেওঁক মঞ্চত সংগ দিয়ে কাটাৰৰ বিশেষভাৱে সক্ষম শিল্পী ঘানেম আল-মুফতাহে।
উদ্বোধনী অনুষ্ঠানৰ পাছতে এতিয়া লেটিন আমেৰিকান দেশ ইকুৱেডৰ আৰু আয়োজক কাটাৰৰ মাজত প্ৰথমখন খেল চলি আছে। বৰ্তমানলৈকে ইকুৱেডৰে প্ৰথমাৰ্ধত দুটাকৈ গ’ল কৰিছে। দুয়োটা গ’লেই কৰিবলৈ সক্ষম হৈছে ইকুৱেডৰৰ এলাৰ ভেলেন্সিয়াই।
Continue Reading
