অৱসৰৰ পাছত ন্যায়াধীশক ২ বছৰলৈ ৰাজনৈতিক পদ গ্ৰহণ কৰাত বাধা প্ৰদানৰ দাবী নাকচ কৰিলে সৰ্বোচ্চ ন্যায়ালয়ে

আদালতে কয় যে এই বিষয়টো অৱসৰপ্ৰাপ্ত ন্যায়াধীশৰ বিবেচনাৰ ওপৰত এৰি দিব লাগে। আৰু কয় যে এনে আদেশ আদালতে দিব নোৱাৰে। আইন প্ৰণয়ন কৰাটো চৰকাৰৰ কাম।বম্বে উকীল সন্থা নামৰ এটা সংস্থাৰ আবেদনত কোৱা হৈছিল যে ন্যায়পালিকাৰ স্বতন্ত্ৰতা আৰু ন্যায়িক ব্যৱস্থাৰ প্ৰতি জনসাধাৰণৰ বিশ্বাস বজাই ৰাখিবলৈ এই কাম কৰাটো প্ৰয়োজনীয়। আৱেদনখনত অন্ধ্ৰ প্ৰদেশৰ ৰাজ্যপাল ন্যায়াধীশ এছ আব্দুল নাজীৰৰ উদাহৰণ প্ৰধানকৈ দিয়া হৈছে। অযোধ্যা গোচৰৰ ৰায় দিয়া বিচাৰপীঠৰ সদস্য আছিল ন্যায়াধীশ নাজিৰ।এই সন্দৰ্ভত গোচৰৰ শুনানি গ্ৰহণ কৰা বিচাৰপীঠৰ অধ্যক্ষ ন্যায়াধীশ সঞ্জয় কিষাণ কৌলে কয় যে, “এজন ন্যায়াধীশৰ প্ৰতি আপোনাৰ বিশেষ আপত্তি আছে যেন লাগে।” আবেদনকাৰীৰ হৈ হাজিৰ হোৱা অধিবক্তা আহমেদ আবদীয়ে কয় যে তেওঁ ন্যায়পালিকাৰ স্বাৰ্থত কথা কৈছে।

এই সন্দৰ্ভত ন্যায়াধীশসকলে কয় যে এনে বহু ন্যায়াধিকৰণ আছে, য’ত কেৱল প্ৰাক্তন ন্যায়াধীশকহে আইনৰ দ্বাৰা নিযুক্তি দিব পাৰি। যিমান দূৰলৈকে নিৰ্বাচন প্ৰতিদ্বন্দ্বিতা কৰা বা কোনো ৰাজনৈতিক পদ লোৱাৰ কথা, উচ্চতম ন্যায়ালয়ে এই সন্দৰ্ভত কোনো নিৰ্দেশ নিদিয়ে। এই বিষয়টো সংশ্লিষ্ট ন্যায়াধীশৰ বিবেচনাৰ ওপৰত এৰি দিব লাগে।

তাৎপৰ্যপূৰ্ণভাৱে বিগত কেইবছৰমানৰ পৰা উচ্চতম ন্যায়ালয়ৰ দুগৰাকী ন্যায়াধীশ অৱসৰৰ কেইমাহমান পাছতে ৰাজ্যপাল হৈ পৰিছে। আনহাতে এজন প্ৰাক্তন মুখ্য ন্যায়াধীশ ৰঞ্জন গগৈ বৰ্তমান ৰাজ্যসভাৰ সদস্য।