ডিজিটেল ডেস্ক; পুনৰ বিদেশ ভ্ৰমণত ব্যস্ত হৈ পৰিছে কংগ্ৰেছ সাংসদ ৰাহুল গান্ধী৷ সম্প্ৰতি ইউৰোপ ভ্ৰমণত ব্যস্ত হৈ আছে ৰাহুল গান্ধী৷ কংগ্ৰেছ নেতা ৰাহুল গান্ধীয়ে মঙলবাৰে আৰম্ভ হোৱা তেওঁৰ প্ৰায় সপ্তাহজোৰা ইউৰোপ ভ্ৰমণৰ সময়ত ইউৰোপীয় ইউনিয়নৰ সাংসদ, শিক্ষাৰ্থী আৰু প্ৰবাসী ভাৰতীয়সকলৰ সৈতে ব্যাপক বাৰ্তালাপ কৰিব। গান্ধীয়ে ৭ ছেপ্টেম্বৰত ব্ৰাচেলছত ইউৰোপীয় ইউনিয়নৰ সাংসদসকলক সাক্ষাৎ কৰিব৷ একেদিনাই প্ৰবাসী ভাৰতীয়ৰ সৈতে নৈশ ভোজত উপস্থিত থাকিব ৰাহুল গান্ধী৷
পিছদিনা অৰ্থাৎ ৮ ছেপ্টেম্বৰত কিছুমান ভাৰতীয় উদ্যোগপতিৰ সৈতে পুৱা এখন বৈঠকত অংশ লোৱাৰ পাছত তেওঁ দুপৰীয়া ১.৩০ বজাত ব্ৰাছেলছত এখন সংবাদমেল সম্বোধন কৰি পেৰিছলৈ ৰাওনা হ’ব। তেওঁ ৮ ছেপ্টেম্বৰত ফ্ৰান্সৰ ৰাজধানীত এখন সংবাদমেল অনুষ্ঠিত কৰিব।
৯ ছেপ্টেম্বৰত তেওঁ ফৰাচী সাংসদসকলৰ সৈতে এখন বৈঠকত মিলিত হ’ব আৰু চায়েন্সেছ পো বিশ্ববিদ্যালয়ৰ শিক্ষাৰ্থীসকলৰ সৈতে বাৰ্তালাপ কৰিব। ১০ ছেপ্টেম্বৰত গান্ধী ৰাওনা হ’ব নেডাৰলেণ্ডলৈ৷ তাত, তেওঁ ৪০০ বছৰ পুৰণি লিডেন বিশ্ববিদ্যালয় পৰিদৰ্শন কৰিব আৰু শিক্ষাৰ্থীসকলৰ সৈতে বাৰ্তালাপ কৰিব।
১১ ছেপ্টেম্বৰত কংগ্ৰেছ নেতাজনে নৰৱে’লৈ যাব, য’ত তেওঁ অছলোত দেশখনৰ সাংসদসকলক সাক্ষাৎ কৰিব। তেওঁ প্ৰবাসী ভাৰতীয়সকলকো লগ কৰিব আৰু অছলো বিশ্ববিদ্যালয়ৰ এখন সভাত অংশগ্ৰহণ কৰিব। জি-২০ সন্মিলন সমাপ্ত হোৱাৰ এদিন পাছত তেওঁ ১২ ছেপ্টেম্বৰত উভতি অহাৰ কথা আছে। জি-২০ সন্মিলন ৯ আৰু ১০ ছেপ্টেম্বৰত দিল্লীত অনুষ্ঠিত হ’ব।
Continue Reading
