ডিজিটেল ডেস্কঃ ক্ৰমাৎ অশান্তৰ পৰা অশান্ত হৈ পৰিছে মণিপুৰ। সেয়ে এইবাৰ দেখা মাত্ৰেই গুলী চলোৱাৰ নিৰ্দেশ জাৰি কৰিছে মণিপুৰৰ গৃহ আয়ুক্ত টি ৰঞ্জিত সিঙে।
সকলো জিলা দণ্ডাধীশ, মহকুমাধিপতি আৰু কাৰ্যবাহী দণ্ডাধীশক গুলীচালনাৰ নিৰ্দেশ দিয়াৰ ক্ষমতা প্ৰদান কৰা হৈছে। মণিপুৰ চৰকাৰে জনাইছে যে ৰাজ্যত শান্তি আৰু আইন-শৃংখলা বজাই ৰাখিবলৈ শ্বুট এট চাইটৰ নিৰ্দেশ দিয়া হৈছে।
মেইটেই সম্প্ৰদায়ে অনুসূচিত জনজাতি (এছ টি)ৰ মৰ্যাদা প্ৰদানৰ বিৰোধিতা কৰি পথত নামিছে সদৌ জনজাতি ছাত্ৰ সন্থা, মণিপুৰ। তেওঁলোকৰ আন্দোলনৰ বাবেই বুধবাৰৰ পৰা উত্তপ্ত হৈ পৰে মণিপুৰ।
মণিপুৰৰ মুখ্যমন্ত্ৰী এন বীৰেণ সিঙে কয় যে পৰিস্থিতি নিয়ন্ত্ৰণৰ বাবে বিভিন্ন উত্তেজনাপূৰ্ণ এলেকাত সেনা মোতায়েন কৰা হৈছে। ইয়াৰ উপৰিও সমগ্ৰ মণিপুৰত ৫ দিন ধৰি বন্ধ কৰি দিয়া হৈছে মোবাইল ইন্টাৰনেট। ৮খন জিলাত জাৰি কৰা হৈছে কাৰ্ফিউ।
উল্লেখ্য যে বুধবাৰৰ পৰা আৰম্ভ হোৱা অশান্তিৰ ফলত কমেও ১১ জন লোক আহত হোৱাৰ লগতে গুলীবিদ্ধ হৈ দুজনৰ মৃত্যু হয়। কংপোকপি জিলাৰ ছৈকুল অঞ্চলত মৃত্যুৰ ঘটনা ঘটিছে। ইয়াৰ উপৰি বিষ্ণুপুৰ, চুৰাচান্দপুৰ, ম’ৰে, ইম্ফল অঞ্চলতো চৰম উত্তেজনা বিয়পি পৰিছে।
Continue Reading
