ডিজিটেল ডেস্ক: গুৱাহাটীৰ শ্ৰীমন্তপুৰৰ ঘৰখন উকা হৈ পৰিল৷ পৰ্বতৰ উচ্চতাত হিমায়িত হ’ল উচ্চাকাংক্ষী দীপশিখাৰ সপোনৰ শিখা৷ উত্তৰাখণ্ডৰ উত্তৰ কাশীত থকা নেহৰু ইনষ্টিটিউট অব্ মাউণ্টেইনিয়াৰিঙৰ ছাত্ৰী দীপশিখা হাজৰিকা সন্ধানহীন হৈছিল উত্তৰাখণ্ডৰ উত্তৰকাশীৰ দ্ৰৌপদীৰ ডাণ্ডাত প্ৰচণ্ড হিমস্খলনত৷ দেশ জোকাৰি যোৱা সেই হিমস্খলনত বৰফে ঢাকি পেলাইছিল দীপশিখাকো৷ আৰু আজি উদ্ধাৰ হ’ল দীপশিখাৰ নিথৰ, নিষ্প্ৰাণ চেঁচা শৰীৰ৷
হিমালয়ক ভাল পোৱা ছোৱালীজনী হিমালয়ৰ শুভ্ৰকোমল বুকুত হেৰাই গ’ল চিৰকালৰ বাবে৷ উল্লেখযোগ্য যে, হিমালয়ত মৃত্যুক সাবটি লোৱা দীপশিখা অসমৰ তৃতীয়গৰাকী পৰ্বতাৰোহী। ১৯৭৯ চনৰ ৫ অক্টোবৰত অসমত পৰ্বতাৰোহণৰ জনক ৰোহিনী কুমাৰ ভূঞাই ৬,৯৪০ মিটাৰ উচ্চতাৰ কেডাৰনাথ Dome শিখৰ আৰোহণ কৰি উভতি অহাৰ পথত বৰফৰ ধুমুহাৰ মৃত্যু হৈছিল।
একেদৰে, ২০১২ চনত EXPLORERS সংগঠনৰ ৬,১৬২ মিটাৰ উচ্চতাৰ Gangstang শিখৰ অভিযানত পৰ্বতাৰোহী ৰবীন্দ্ৰ লাল দাসে High Altitude Sicknessত আক্ৰান্ত হৈ প্ৰাণ হেৰুৱাইছিল। আৰু যোৱা ৪ অক্টোবৰত ৫,৭৬০ মিটাৰ ওখ ‘দ্ৰৌপদী কা ডাণ্ডা ২’ শিখৰৰ পৰা নামি অহাৰ সময়তে গুৱাহাটীৰ দীপশিখাই হিমস্খলনৰ কবলত আন ২৮গৰাকী পৰ্বতাৰোহীৰ সৈতে সন্ধানহীন হৈ পৰে৷
আজি দীপশিখাৰ লগতে মেঘালয়ৰ পৰ্বতাৰোহী টিকলু জৈৰ্ৱাৰো মৃতদেহ উদ্ধাৰ হৈছে। খবৰ অনুসৰি প্ৰথমে দিল্লীলৈ লৈ অনা হ’ব দীপশিখাৰ নশ্বৰ দেহ। দীপশিখাৰ মৃতদেহ চমজি ল’বলৈ উত্তৰাখণ্ডলৈ ৰাওনা হৈছে দিল্লীৰ অসম ভৱনৰ প্ৰতিনিধি দল৷ মৃতদেহ আৰ্মি হাস্পতালৰ পৰা দিল্লীলৈ অনা হ’ব। দিল্লীৰ পৰা অসম চৰকাৰৰ সহযোগত কাইলৈ গুৱাহাটীলৈ অনা হ’ব দীপশিখাৰ মৃতদেহ।
এতিয়া দীপশিখাৰ মৃত্যুৰ খবৰে শোকাহত কৰিছে ৰাজ্যবাসীক৷ বিদায়, দীপশিখা, ‘মৃত্যুৰ বতাহে তোমাৰ শিখা নকঁপায়’৷
Continue Reading
