ডিজিটেল ডেস্কঃ অষ্ট্ৰেলিয়াৰ বিৰুদ্ধে দিল্লী টেষ্টৰ পূৰ্বে ভাৰতীয় দলত বিবাদ হৈছে নেকি? বিৰাট কোহলীয়ে দলৰ সৈতে একেলগে থকা নাই। ভাৰতীয় দলটোৱে হোটেলো সলনি কৰিব লগা হৈছে বুলি জানিব পৰা গৈছে। মুঠতে খেলপথাৰত নমাৰ পূৰ্বে চৰ্চাত আছে ভাৰতীয় দল।
ভাৰতীয় দলৰ সূত্ৰ অনুসৰি, কোহলীয়ে দলৰ সৈতে হোটেলত নাথাকে। তেওঁৰ ঘৰ গুৰুগ্ৰামত। তাতে তেওঁ পৰিয়ালৰ সৈতে থাকে। বহু দিনৰ মূৰত দিল্লীলৈ আহিছে কিং কোহলী। গতিকে পৰিয়ালৰ সৈতে সময় কটাব বিচাৰিছে ভাৰতীয় প্ৰাক্তন অধিনায়কগৰাকীয়ে। আনকি কোহলীয়ে নিজৰ গাড়ীৰে ফিৰোজ শ্বাহ কোটলা খেলপথাৰলৈ গৈ আছে। দলৰ লগত কোনো বিবাদ নাই, পৰিয়ালৰ লগত থাকিবলৈ এই সিদ্ধান্ত লৈছে ক্ৰিকেটাৰগৰাকীয়ে।
ইয়াৰ মাজতে ভাৰতীয় দলৰ হোটেলখনো সলনি কৰিবলগীয়া হৈছে। নিউজ এজেন্সি এ এন আইয়ে প্ৰকাশ কৰা অনুসৰি, ভাৰতীয় দলটোৱে পূৰ্বে দিল্লীলৈ যোৱাৰ সময়ত থকা হোটেলত এতিয়া নাই। ভাৰতীয় দলটো থাকিব লগা হোটেলখনৰ বহু কোঠা ইতিমধ্যে জি-২০ ছামিট আৰু বিয়াৰ বাবে বুকিং হৈ আছে। সেই কাৰণেই দলটোক দিল্লীৰ একেবাৰে সিটো মূৰত থকা এখন বিলাসী হোটেলত থকাৰ ব্যৱস্থা কৰা হৈছে।
নাগপুৰত অনুষ্ঠিত প্ৰথমখন টেষ্টত অষ্ট্ৰেলিয়াক এটা ইনিংছ আৰু ১৩২ ৰানেৰে পৰাস্ত কৰি ভাৰতে শৃংখলাত অগ্ৰগতি লাভ কৰে। দিল্লীত টেষ্টত জয়লাভ কৰিলে ভাৰতে শৃংখলা জয়ৰ ওচৰ চাপিব। তাৰ সমান্তৰালকৈ ৰোহিত শৰ্মাই বিশ্ব টেষ্ট চেম্পিয়নশ্বিপৰ ফাইনেল খেলিবলৈ বহু দূৰ আগবাঢ়িব। আনহাতে, অষ্ট্ৰেলিয়াকো বিশ্ব টেষ্ট চেম্পিয়নশ্বিপৰ ফাইনেল খেলিবলৈ অন্ততঃ এটা টেষ্ট জয়ৰ প্ৰয়োজন। গতিকে দুয়োটা দলে জয়ৰ লক্ষ্যৰে খেলপথাৰত প্ৰৱেশ কৰিব।
Continue Reading
