ডিজিটেল ডেস্কঃ কম বয়সতে এগৰাকী অতি সফল অভিনেত্ৰী হিচাপে শিৰোনাম দখল কৰি আহিছে আলিয়া ভাটে। তেওঁ শিশুৰ বাবে এটা কাপোৰৰ ব্ৰেণ্ডো গঠন কৰিছে। ব্ৰেণ্ডৰ কাৰ্যকলাপৰ সৈতে ছ’চিয়েল মিডিয়াতো সক্ৰিয় হৈ আছে ৰণবীৰ-পত্নী।
শেহতীয়াকৈ তেওঁৰ এই সক্ৰিয়তাৰ প্ৰতি আকৃষ্ট হৈ পৰিছে ‘আৰ আৰ আৰ’ৰ সহ অভিনেতা জুনিয়ৰ এন টি আৰ। অভিনেতাজনৰ দুই পুত্ৰ অভয় ৰাম আৰু ভাৰ্গৱ ৰামক নিজৰ ব্ৰেণ্ডৰ কিছু সামগ্ৰী উপহাৰ দিছে আলিয়াই।
জুনিয়ৰ এনটিআৰে এই উপহাৰ লাভ কৰি বহুত সুখী হৈ পৰিল। তেওঁ ইনষ্টাগ্ৰামত তেওঁৰ দুই পুত্ৰৰ নাম থকা বেগটোৰ ফটো পোষ্ট কৰে। আলিয়াক ধন্যবাদ জনাই ধেমালিতে লিখিলে, “মইও সোনকালে মোৰ নাম লিখা উপহাৰৰ বেগ এটা পাম বুলি আশা কৰিছো!”
আলিয়াই ইয়াৰ প্ৰত্যুত্তৰত লিখিছে- “মই তোমাক কাপোৰৰ উপহাৰ এটা পঠাম। ধন্যবাদ।"
অস্কাৰ লাভ কৰাৰ আনন্দৰ লগতে বিশ্বব্যাপী বক্স অফিচত এবছৰ সম্পূৰ্ণ কৰিছে ‘আৰ আৰ আৰ’। এই ছবিখনত আলিয়াই অতিথি চৰিত্ৰ ‘সীতা’ৰ চৰিত্ৰত অভিনয় কৰিছিল। জুনিয়ৰ এন টি আৰৰ চৰিত্ৰটো কুমাৰম ভীমৰ চৰিত্ৰৰ ওপৰত আধাৰিত আছিল।
এছ এছ ৰাজামৌলিৰ পৰিচালিত এই ছবিখনে বহু মাইলৰ খুঁটি স্পৰ্শ কৰিছে। ৯৫ সংখ্যক একাডেমী বঁটাত শ্ৰেষ্ঠ মৌলিক গীতৰ সন্মান লাভ কৰে ছবিখনৰ গীত ‘নতু নাতু’। ‘নতু নাতু’ ভাৰতৰ প্ৰথমটো অইংৰাজী ভাষাৰ গীত হিচাপে গৌৰৱ লাভ কৰিছে।
Continue Reading
