অসমৰ সৈতে চুবুৰীয়া ৰাজ্যৰ সীমাবিবাদ: নিষ্পত্তিৰ বাবে কেন্দ্ৰীয় চৰকাৰে পদক্ষেপ গ্ৰহণ কৰাৰ কথা ঘোষণা

ডিজিটেল ডেস্ক: অসমৰ সৈতে চুবুৰীয়া ৰাজ্যৰ সীমা বিবাদ অসমৰ অন্যতম এটি সামাজিক সমস্যা হিচাপে ইতিমধ্যে চিহ্নিত হৈছে৷ সময়ে সময়ে এই সীমা বিবাদে ধাৰণ কৰিছে ভয়াৱহ ৰূপ৷ অসমৰ সৈতে অন্যান্য ৰাজ্যৰ মাজত সীমান্ত বিবাদৰ সৌহাৰ্দ্যপূৰ্ণ নিষ্পত্তিৰ বাবে কেন্দ্ৰই সহায়ক হিচাপে কাম কৰি আছে বুলি সদৰি কৰিছে কেন্দ্ৰীয় চৰকাৰৰ গৃহ ৰাজ্যিক মন্ত্ৰী নিত্যানন্দ ৰায়ে৷ কালি কেন্দ্ৰীয় গৃহ ৰাজ্য মন্ত্ৰী নিত্যানন্দ ৰায়ে কয় যে, কেন্দ্ৰীয় চৰকাৰে অসম আৰু উত্তৰ-পূৰ্বাঞ্চলৰ আৰু চাৰিখন ৰাজ্যৰ মাজত সীমান্ত বিবাদ নিষ্পত্তি কৰিবলৈ চেষ্টা কৰি আছে যাতে কোনো ৰাজ্যতে কোনোধৰণৰ সীমাবিবাদ নহয়। সাংসদ পুষ্পেন্দ্ৰ সিং চান্দেলে লোকসভাত সোধা এটা প্ৰশ্নৰ উত্তৰত নিত্যানন্দ ৰায়ে কয় যে, অসম-নগালেণ্ড, অসম-অৰুণাচল প্ৰদেশ, অসম-মিজোৰাম আৰু অসম-মেঘালয়ৰ মাজৰ বিবদমান অঞ্চলসমূহৰ সীমা সমস্যা সংশ্লিষ্ট ৰাজ্যসমূহৰ গণতান্ত্ৰিক দাবীৰ দ্বাৰা বিকশিত হৈছে। তেওঁ লগতে কয়, উপলব্ধ তথ্য অনুসৰি অসম-মেঘালয়, অসম-নগালেণ্ড, অসম-অৰুণাচল প্ৰদেশ আৰু অসম-মিজোৰামৰ মাজৰ অঞ্চলসমূহত সীমা নিৰ্ধাৰণৰ ফলত সীমাবিবাদ উদ্ভৱ হৈছে। মন্ত্ৰীগৰাকীয়ে লগতে কয়, কেন্দ্ৰীয় চৰকাৰৰ দৃষ্টিভংগী হৈছে যে, আন্তঃৰাজ্যিক বিবাদবোৰ কেৱল সংশ্লিষ্ট ৰাজ্য চৰকাৰৰ সহযোগিতাৰেহে সমাধান কৰিব পাৰি আৰু কেন্দ্ৰীয় চৰকাৰে পাৰস্পৰিক বুজাবুজিৰ ভাবনাৰে বিবাদৰ সৌহাৰ্দ্যপূৰ্ণ নিষ্পত্তিৰ বাবে সহায়ক হিচাপে কাম কৰে৷ ৰাজ্যসমূহৰ সীমাসমস্যাৰ সমাধান কৰিবলৈ কেন্দ্ৰীয় চৰকাৰ দায়বদ্ধ৷