অসমত বানৰ সংহাৰ অব্যাহত: মৃতকৰ সংখ্যা ৯৭লৈ বৃদ্ধি, ১.৬৮ লাখ লোক এতিয়াও বানাক্ৰান্ত

শুক্ৰবাৰেও অসমত বান পৰিস্থিতিৰ অৱনতি অব্যাহত আছে। ৰাজ্যজুৰি চলি থকা বানৰ সংহাৰে এতিয়াও বহু অঞ্চলত জনজীৱন ব্যাহত কৰি ৰাখিছে। শেহতীয়াকৈ গোলাঘাট আৰু ওদালগুৰি জিলাত দুজনকৈ লোকৰ মৃত্যু হোৱাৰ পিছত এইবাৰৰ বানত মৃতকৰ সংখ্যা ৯৭ লৈ বৃদ্ধি পাইছে। বিষয়াৰ তথ্য অনুসৰি, বৰ্তমান ৰাজ্যৰ ১৫খন জিলাৰ প্ৰায় ১.৬৮ লাখ লোক এতিয়াও বানৰ কবলত পৰি আছে।

বানৰ ফলত ক্ষতিগ্ৰস্ত হোৱা জিলাসমূহৰ ভিতৰত আছে গোলাঘাট, শিৱসাগৰ, ওদালগুৰি, কামৰূপ মহানগৰ, নগাঁও, কামৰূপ, দৰং, শোণিতপুৰ, হোজাই, লখিমপুৰ, বিশ্বনাথ, যোৰহাট, চৰাইদেউ, কাৰ্বি আংলং আৰু ধেমাজি। আটাইতকৈ বেছি ক্ষতিগ্ৰস্ত হোৱা জিলা হিচাপে গোলাঘাট চিহ্নিত হৈছে, য'ত প্ৰায় ৫৪,০০০ লোক বানৰ ফলত প্ৰভাৱিত হৈছে। ইয়াৰ পিছতে শিৱসাগৰত প্ৰায় ৪৯,০০০ আৰু যোৰহাটত প্ৰায় ২৭,০০০ লোকে বানৰ কৱলত পৰি আছে।

বানাক্ৰান্ত লোকসকলক সহায়ৰ বাবে ৰাজ্যজুৰি ১৩৩টা সাহায্য শিবিৰ আৰু বিতৰণ কেন্দ্ৰ স্থাপন কৰা হৈছে। এই শিবিৰসমূহত প্ৰায় ৪৫,০০০ লোকে আশ্ৰয় লৈ আছে আৰু তেওঁলোকক খাদ্যকে ধৰি আন আন অত্যাৱশ্যকীয় সামগ্ৰী যোগান ধৰা হৈছে। নদ-নদীৰ জলস্তৰ বৃদ্ধি আৰু অবিৰত বৰষুণৰ ফলত ৰাজ্যৰ বিভিন্ন প্ৰান্তত বান পৰিস্থিতি এতিয়াও উদ্বেগজনক হৈ আছে। আগন্তুক দিনবোৰত বতৰৰ পৰিস্থিতিৰ ওপৰত সকলোৰে দৃষ্টি নিবদ্ধ হৈ আছে।